Euskal Herriko 85 entitate baino gehiago batu dira Euskaraldira

‘Euskaraldia: 11 egun euskaraz’ ariketa sozialari atxikimendua eman dioten 85 bat entitateetatik 55 baino gehiagoko ordezkariek agerraldia egin dute Gasteizko Oihaneder Euskararen Etxean. Azaroaren 23tik abenduaren 3ra euskararen erabilerari dagokionez herritarren hizkuntza ohituretan eragiteko helburua duen ariketan parte hartzeko Euskal Herri osoko 350 herritik gora eman dute izena eta entitateen artean 85 baino gehiago zenbatu daitezke.

Euskal Herri osoan batera egingo da, baina herriz-herri antolatzen ari da «11 egun euskaraz» lelopean antolatzen ari den ariketa. Bertan, «ahobizi» eta «belarriprest» rolak jokatuko dituzte parte hartzaileek. Horrela, «ahobiziek» 11 egun horietan euskara ulertzeko gai diren guztiei euskaraz zuzentzeko konpromisoa hartuko dute, eta «belarriprestek» euskaldun guztiei adieraziko diete beraiei euskaraz hitz egiteko.

Miren Dobaran Lakuako Hizkuntza sailburuordeak entitateen konpromisoaren garrantzia azpimarratu du: «Euskaraldia arrakastatsua izan dadin, ariketa sozial honek hainbat bidelagun behar ditu. Hiztunak aktibatzeko aliatuak behar ditugu, eta gaur gurekin dauden entitateek norabide horretan lagunduko gaituzte», adierazi du.

Eta entitateek konpromiso hau berretsi dute. «Herritarrei bidea erraztuko diete beren eremuan ahobizi eta belarriprest gisa hizkuntzaren erabileran urratsak eman ditzaten. Horretarako ekimenaren zabalkundea egin, kideak aktibatu, eta ariketa egiteko baliabideak eskainiko dizkiete», azaldu du. Arrate Illaro, Euskaltzaleen Topaguneko kideak.

Bide beretik, «elkarlanaren garrantzia» azpimarratu du Izaskun Landaida Emakundeko zuzendariak: «Euskaraldia batasun eta elkarlan horren adierazpen bat da. Denak batera helburu berdina lortzeko».

‘Euskaraldia: 11 egun euskaraz’ proiektuan parte hartuko duten entitateek langile, bezero eta bazkideei parte hartzeko gonbitea egiteko konpromisoa hartu dute