«Xua Gurasoekin Etxera!» herri ekimena aurkeztu dute

Valentziako Picassent espetxean jaio zen haur bat da Xua. Urtarrilean beteko ditu hiru urte eta Olatz Lasagabaster eta Patxi Uranga gurasoengandik banatuko dute. Hauek ekainaren 23an beteko dituzte 10 urte kartzelan. 12 urteko zigorraren hiru laurdenak ongi beteak dituzte dagoeneko biek, eta espainiako legediaren arabera baldintzapeko askatasunean beharko lukete.

«Xua Gurasoekin Etxera!» herri ekimena sortu dute senide, lagun eta herritarrek, bai haurrak eta bai bere gurasoek etxean behar luketeelako legez. 2017ko urtarrilean jaio zen Xua Picassenteko espetxean. Han daude gaur egun. Baina laster banatuko da familia Xua Euskal Herrira etorriko baita urtarrilean. Eta gurasoek preso jarraituko dute.

«Banaketa benetan gogorra izango da. Hiru urteko umetxo bati gurasoekin egoteko eskubidea kenduko zaio», nabarmendu dute Usurbilgo Askatasuna plazan egin duten plataformaren aurkezpenean. Xuaren aiton-amonak, senideak eta herri ekimen hau martxan jarri duten Orioko eta Usurbilgo lagunak bildu dira.

Sinadura bilketa, mozio aurkezpenak Usurbil eta Orioko udaletan, arropa salmenta, postal bidalketa, familiaren egoera azaltzen duen aldizkari baten argitalpena... Hamaika ekintza iragarri dituzte Xua eta bere familia elkarrekin etxera ekartzeko.

Lasagabaster eta Uranga 2009an atxilotu zituzten, ETAko kideak izatea leporatuta. Inkomunikaturik egon ziren aldian tratu txarrak salatu zituzten biek.