Kristautasunaren aurreko hilarri bat aurkitu dute Foruko San Kristobal ermitan

Foruko San Kristobal ermita zaharberritzeko obretan, udalerriko alkateak ondare eta historia balio handiko hilarri bat aurkitu du obretara egindako bisitetako batean.

Foruko Udalak eta parrokiak San Kristobal baselizan abian jarri dituzten zaharberritze lanen testuinguruan, kristautasunaren aurreko hilarri bat aurkitu da, ondare eta historia aldetik aparteko balioa duena. Foruko alkateak, Mikel Magunazelaiak, luzitu zati txiki bat kendu eta leiho baten ateburua aurkitu zuen, balio historiko handiko pieza izan zena.

Udalak ohar baten bidez azaldu duenez, aurtengo urrian batzorde bat sortu zen, honako hauek osatua: Udalaren ordezkariak, Bizkaiko Foru Aldundiko Kultura saileko Kultur Ondarearen Zerbitzua, Gotzaindegia, Elizbarrutiko Arte Sakratuaren Museoa, Gernikazarra Historia Taldea eta Ramon Gabiola enpresa kontratatua, aurretiazko balioespena, zaintza arkeologikoa eta obrak zehazteko. Testuinguru horretan, eta nabearen estalkia ordeztea bukatuta, aurkitu da pieza.

Alkateak obretara egindako bisita batean, eta obrako arduradunarekin batera, ikusi nahi izan zuen zer eragin izan lezakeen jadanik hondatuta zegoen luzituaren zati bat kentzeak, ukitze-geruza horrek ezkutatutako leihotik argia sar zedin, eta hilarria aurkitu zuen. Aurkikuntza berehala jakinarazi zitzaion Bizkaiko Foru Aldundiko Kultura saileko Kultur Ondarearen Zerbitzuari, eta pieza horri buruzko txostena prestatzen ari da orain.

Harri sakratua

Estela, kristautasunaren aurrekoa, 80 x 35 x 18 zentimetrokoa, hareharrizko pieza bat da, eta aurrealdean eguzkia irudikatzen duen disko astrala du. Kantuan bi gurutze paralelo ditu, goiko erdiko altuerarekiko perpendikularki gurutzatzen direnak beste bi berdinekin. Harri sakratua da, mendeetan zehar goratua.