Zierbena, bigarren txandatik, eta Arraun Lagunak garaile Getxoko behe laino artean
Lehia bizia mantendu du Oriok, ohorezko txandan, haizearen kontra eta 2. txandatik aritu den Zierbenaren denbora hobetzeko eta Getxoko bandera irabazteko. Azkenean, bizkaitarrek eraman dute garaipena. Hondarribia izan da hirugarren. Nesketan, Arraun Lagunakek irabazi du estropada.
Getxoko inguruak behe lainoarekin ikus zitezkeen bertako bandera lehiatu den bitartean. Haizeak eragin handia izan du txanda batetik bestera. Hala, Zierbena, bigarren txandatik, eta Arraun Lagunak izan dira garaileak Eusko Label eta Euskotren Ligan, hurrenez hurren.
Gizonezkoen estropadan, haizeak behetik gora egin du eta hortxe erabaki da Getxoko bandera. Pentsa, lehen txandan haizearen abiadura 13 kilometro ordukoa zen, bigarrenean 14,6koa eta ohorezko txandan 16,1ekoa.
Oriok oso gertu izan du garaipena. Lehenik, Hondarribiarekin lehia sendoa mantendu du. “Ama Guadalupekoa” liderra izan da azken txandako lehen bi ziabogetan. Baina hortxe oriotarrek aurre hartu dute eta pixkanaka berdeak atzean utzi dituzte.
Beste lehia bat hasi da orduan Oriorentzat. Izan ere, lehen ziabogan ezin izan dute lehen txandan aritu den Ondarroaren denbora hobetu; eta bigarren eta hirugarrenean Zierbenarena ezta ere. Beraz, hortxe zegoen bandera. Azken luzean segundo bat aurretik jarri dira gipuzkoarrak, baina haizeak ez die utzi azken sprinta hobeto egiten eta 1.50 segundorengatik irabazi du Zierbenak Getxoko bandera.
Orio bigarren izan da, Hondarribiaren aurretik, eta Santurtzik laugarren postua lortu du estropadan.
Zierbenaren nagusitasuna
Zierbenak ez du ezustekorako aukerarik eman bigarren txandan, eta amaieran ikus denez, sendoena izan da denboraldiko bigarren bandera irabaziz. Oso indartsu atera dira bizkaitarrak, eta Donostiarrak, Cabok eta Lekittarrak bere itzala besterik ezin izan dute jarraitu.
Lehen ziabogan, sei segundoko aldea zuen Zierbenak Donostiarrarekiko, 18 Caborekiko eta 19 Lekittarrarekiko. Gainera, Cabok denbora gehiago galdu du maniobra ostean. Hala, txandako garaipena eskuan zuten bizkaitarrek, “Torrekua II.a” ontzi donostiarrak segundoak galtzen joan baita hurrengo ziaboga eta luzeetan.
Helmugan, Zierbenak ordurako denbora onena markatu du (19:58.31), Donostiarrari 14 segundo ateraz. Cabo hirugarren izan da, 30 segundora, eta Lekittarra, laugarren, 38 segundora.
Lehen txanda: Ondarroa indartsu
Getxoko estropada minutu batzuk beranduago hasi da ontziek irteeran haizearekin izandako arazo batzuengatik. Baina behin semaforoak irteera eman duenean, lehen lau traineruak martxan ipini dira.
Larunbatean izandako emaitza kaxkarrari buelta eman nahirik, Ondarroa lidergoan jarri da hasieratik. Duela astebete Petronor Banderako irabazleak gaur ez zuen ezustekorik nahi eta ziaboga guztietatik lehenengoa pasa da. Lehenengo biraketan zazpi segundoko aldea atera die Ares eta Zarautzi; bigarrenean 11 eta 12 segundo; eta hirugarrenean 14 eta 19. Tiran, ordea, oso atzean geratu da eta helmugan 31.91 segundo galdu ditu “Antiguako Ama” ontziarekiko.
Ondarroa eta Ares, gainera, Donostiarra eta Caboren artean sailkatu dira estropadan, eta Zarautzek Lekittarra gainditu du.
Eusko Label - Getxoko XLIII Ikurrina
1. Zierbena 19:58.20
2. Orio 19:59.70
3. Hondarribia 20:05.30
4. Santurtzi 20:08.38
5. Donostiarra 20:12.12
6. Urdaibai 20:16.08
7. Ondarroa 20:16.54
8. Ares 20:28.24
9. Cabo 20:28.46
10. Zarautz 20:35.94
11. Lekittarra 20:36.86
12. Tiran 20:48.28
Eusko Label Liga - Sailkapen nagusia
1. Santurtzi 63 puntu
2. Hondarribia 56
3. Zierbena 54
4. Orio 49
5. Donostiarra 47
6. Urdaibai 44
7. Ondarroa 35
8. Cabo 32
9. Lekittarra 27
10. Ares 25
11. Tiran 20
12. Zarautz 16
Euskotren Liga: Arraun Lagunak garaile
Poztasun handiz ospatu dute Arraun Lagunakeko arraunlariek Getxon lortutako lehen garaipena. Eta nola ez da bada izango! Denboraldiko garaipenik 'lasaiena' izan da igande honetakoa Bizkaiko kostako itsaso zabalean. 7.32 segundoko aldea atera diote Hondarribiari.
Hasiera-hasieratik nabarmendu dira donostiarrak lidertzan. Atzetik, denboraldian zehar behetik gorantz datorren "Ama Guadalupekoak" bigarren postua ziurtatu du lehen ziabogan -hiru segundoko aldea zuen orduan Donostiarra eta Oriorekiko-, eta larunbatean etxean garaile izan zen Oriok behetik gora egin du estropadan, bigarren luzean azken postutik hirugarrenera igoz.
Azkenik, Donostiarra laugarren izan da gaurkoan, irabazlearengandik 13.93 segundora.
Euskotren Liga - Getxoko XIII Ikurrina
1. Arraun Lagunak 10:47.74
2. Hondarribia 10:55.22
3. Orio 10:59.90
4. Donostiarra 11:01.90
Euskotren Liga - Sailkapen nagusia
1. Arraun Lagunak 19 puntu
2. Orio 19
3. Hondarribia 11
4. Donostiarra 11
KAE1 eta KAE2: Pedreña eta Portugalete garaile
Arraunak beste bi estropada utzi ditu igande honetan Orio eta Portugaleten. KAE1 ligari dagokionez, Pedreñak irabazi du Gipuzkoako kostaldeko uretan. Hiru segundoko aldearekin gailendu zaio Kaikuri. San Pedro hirugarren izan da eta Arkotek, bigarren txandatik, ohorezko txandan aritu den Getariaren aurretik amaitu du estropada.
KAE2 Liga, aldiz, Portugaletek etxean irabazi du. Hiru segundoko aldea atera dio Deusturi, eta zortzi segundo Busturialdeari.
KAE1 - Orio Kanpiña III. Bandera
1. Pedreña 20:29.48
2. Kaiku 20:32.37
3. San Pedro 20:37.20
4. Arkote 20:46.51
5. Getaria 20:51.44
6. San Juan 20:54.00
7. Castro 21:08.66
8. Camargo 21:19.70
9. Orio 21:34.59
10. Astillero 21:41.42
11. Lapurdi 21:48.00
. Deustu ez du parte hartu
. Zumaia ez du parte hartu
KAE1 - Sailkapen nagusia
1. Getaria 11,00 puntu
2. Pedreña 10,88
3. San Pedro 10,63
4. Kaiku 10,38
5. Arkote 9,25
6. San Juan 9,00
7. Deustu 8,67
8. Zumaia 6,57
9. Orio 4,63
10. Castro 4,00
11. Camargo 3,88
12. Astillero 2,88
13. Lapurdi 1,71
KAE2 - Portugaleteko XXXIX. Bandera
1. Portugalete 21:06.75
2. Deustu 21:09.46
3. Busturialdea 21:14.20
4. Mutriku 21:17.66
5. Hibaika 21:30.09
6. Zarautz 21:39.76
7. Hondarribia 21:41.72
8. Santoña 21:58.68
9. Illunbe 22:23.20
10. Donostiarra 22:44.12
KAE2 - Sailkapen nagusia
1. Portugalete 45 puntu
2. Busturialdea 43
3. Deustu 34
4. Hondarribia 33
5. Mutriku 31
6. Donostiarra 27
7. Zarautz 25
8. Hibaika 20
9. Santoña 11
10. Illunbe 6