Aginagalde deialditik kanpo eta Gurbindoren bi golekin, Espainiak Alemania garaitu du

Eskubaloiko Espainiako selekzioak Alemania hartu du mendean Olinpiar Jokoetako lehen jardunaldian. Eduardo Gurbindo nafarrak bi gol egin ditu eta Julen Aginagalde deialdi kanpo geratu da. 

Ikuskizun ederra eskainiz hasi da eskubaloia Olinpiar Jokoetan. Euskal Herriko ordu txikietan Norvegiak Brasil garaitu du, baita Frantziak Argentina ere eta gutxigatik izan bada ere, Suediak Bahrain hartu du mendean. Eta goizarekin jarraitzeko, Espainia eta Alemaniaren arteko erakustaldia selekzioa espainiarraren alde jausi da. 

Gol bateko aldearekin irabazi du Espainiak Alemaniaren aurkako partida (27-28) Olinpiar Jokoetako lehenengo jardunaldian. Alemanak markagailuan aurretik joan dira atsedenaldira (13-12) baina bigarren zatian, behin 15 golera berdinduta, Espainiak aurrea hartu eta bukaeraraino gailendu da. 

Hiru goleko aldea ere izan du selekzio espainiarrak (16-19, 38. minutuan) baina ohartu orduko, bi gol egin ditu Alemaniak, aldeak murrizteko. 22 golera berdintzea ere lortu dute alemaniarrek eta estu joan da neurketaren azken fasea. Alex Dujshebaev-en azken bi golek (lau gol egin ditu guztira) eta azken jaurtiketako alemaniarren hutsegiteak eman diote urrezko garaipena Espainiako selekzioari. 

Eduardo Gurbindo nafarrak –egun HBC Nantes talde frantsesean dabilenak– bi golekin lagundu du garaipen horretan, bata lehen zatian eta bestea bigarrenean eginda. Julen Aginagalde irundarrak, bestalde, deialditik kanpo geratu da. Piboteak aste honetan bertan Bidasoa Irunekin berritu du beste urtebaterako kontratua.