20.000 euro arteko dirulaguntza ertzainei, ‘World Police and Fire Games’ jokoetarako

Lakuak Rotterdamen ospatuko diren ‘World Police and Fire Games’ kirol ekimenean parte hartuko dituen ertzainei 20.000 euro arteko dirulaguntza emango diela jakinarazi du. Ertzaintzaren «irudi ona eta balioak» atzerrian sustatzeko «aukera bikaina» dela deritzo.

Mundu mailan Ertzaintzaren «irudi ona eta balioak» sustatzeko «aukera bikaina» dela ebatzita, Lakuako Gobernuak astelehen honetan iragarri du 20.000 eurorekin finantzatuko dituela ‘World Police and Fire Games’ kirol ekimenean parte-hartuko duten Ertzaintzako agenteak. Aurtengo edizioa Rotterdamen ospatuko da, Herbehereetan, uztailaren 22tik 31ra.

Segurtasun Sailaren azalpenen arabera, ‘World Police and Fire Games’ ekimenaren helburua «kirolari esker, mundu osoko polizia-agenteen eta suhiltzaileen artean esperientziak trukatzea» omen da, eta, aldi berean, «segurtasun-zerbitzu publikoen artean adiskidetasuna» eta «sasoian egoteko motibazioa» sustatzea.

Gainera, Lakuak uste du «garrantzizkoa» dela Ertzaintzako agenteek «nazioarteko kirol-proba horietan parte hartzea»; izan ere, Josu Erkorekaren gidaritzapeko sailak zehaztu duenez, gainerako agenteek kirola ohituraz egiteko «pizgarri bat» da nazioarteko topaketa eta, horrekin, agenteen «gaikuntza, sasoia eta osasuna» hobetzen omen dira.

2019ko jokoak

Pandemia dela tarteko, azken bi urteetan ez dira ‘World Police and Fire Games’ jokoak ospatu. Azken edizioa Chengdu hiri txinatarrean izan zen, eta 69 herrialdetako 8.000 polizia eta suhiltzaile aurkeztu ziren guztira.

Horien artean, Ertzaintzako zazpi agente egon ziren, sei gizon eta emakume bat, eta, orotara, hamabi domina lortu zituzten atletismo, igeriketa, txirrindularitza eta taekwondo modalitateetan.