Kilian Jornet eta Nienke Brinkman errekorrak hautsita nagusitu dira Zegama-Aizkorrin
Kilian Jornetek hamargarren aldiz irabazi du Zegama-Aizkorri mendi lasterketa eta oraingoan, Stian Angermund norvegiarraren errekorra hautsi du. Emakumezkoetan Nienke Brinkman herbeherearra gailendu da, 2017an Maite Maiorak egindako denbora onduz. Sara Alonso donostiarrak podiuma osatu du.
Eguraldia lagun, jende ugari batu da Zemaga-Aizkorri mendi maratoian. Lasterketa esanguratsu hau, aurtengoan Golden Trail World Series zirkuiturako baliagarria, bi urtez lehiatu gabe egon da eta korrikalariak zein ikusleak oso gogotsu zeuden, igande honetan erakutsi bezala.
Goi-mailako kirolariak hurbildu dira hitzordura eta ikuskizun aparta bizi ahal izan da. Kilian Jornetek irabazi du gizonezkoetan eta Nienke Brinkman gailendu da emakumezkoetan. Katalanak aurreikuspen osoak bete eta bere hamargarren garaipena erdietsi du. Hasiera batean, Davide Magrini italiarrarekin lehia estua izan du baina Aizkorra igotzen atzean utzi du Magrin eta azken kilometroak bakar-bakarrik egin ditu.
Nahiz eta lehiakortasun handirik izan ez duen, Stian Angermund norvegiarraren errekorra zazpi minutuan hobeto du katalanak. Sekulako erakustaldia eman duela, alegia. Magrini italiarraren atzetik, podiuma osatzen, Leongo Manu Merillas helmugaratu da.
Emakumezkoetan ustekabe handiagoa izan da Nienke Brinkman herbeherearraren garaipena nahiz eta hasieratik lasterketan bera nabarmendu den. Maude Mathys suitzarra, faborito handia, lehen txanpan utzi du atzean eta ibilbide osoan aurretik joan da Brinkman. Adibide gisara, Aizkorri puntara iritsi denean, 4 minutu eta 44 segundoko aldea ateratzen zion suitzarrari eta gauzak ondo bidean, garaipena eskuetan zeukan. Garaipena ez ezik, 2017an Maite Maiorak egindako denbora ondu du 18 minututan.
Mathysek, gainera, atzetik zetorren Sara Alonso donostiarrarekin adi ibili beharra izan du. Intxaurrondoakoa hirugarren helmugaratu da, bigarrenetik soilik 37 segundora. Oso lasterketa ona burutu du gipuzkoarrak, podiuma osatzeko aurreikusten ziren beste korrikalarien aurretik ibilita.
Gizonezkoen sailkapena
1. Kilian Jornet 3.36:41
2. Davide Magrini +2:31
3. Manu Merillas +9:03
Emakumezkoen sailkapena
1. Nienke Brinkman 4.16:43
2. Maude Mathys +9:20
3. Sara Alonso +9:57