VW Nafarroak amaitu gabe ditu 10.000 auto baino gehiago, piezarik ez dagoelako

Erdieroaleen hornikuntza faltaren ondorioz, Volkswagen Nafarroa zailtasunak izaten ari da autoak amaitzeko. Egun, 10.000 kotxe baino gehiago ditu bukatu gabe; Iruñeko fabrikan, Irañeta udalerrian nahiz Santanderko Portuan aparkatuta.

Iruñeko Volkswagen-en lantegiak amaitu gabeko 10.000 kotxe baino gehiago ditu, erdieroaleen horniduran dauden arazoak direla eta, enpresako zuzendaritzak Efe berri agentziari jakinarazi dionez.

Nafarroako hiriburuko lantegian bertan, T-Cross, Taigo eta Polo modeloetako 6.000 unitate daude aparkatuta, bai bukatutako autoak gordetzeko erabili ohi den zelai nagusian, bai instalazioko beste leku batzuetan, hala nola Landabengo fabrikaren barneko bideetan.

Gainerakoak, lehenik eta behin, enpresak Irañeta udalerrian duen landara eraman dituzte enpresako arduradunek, zeina kamioiak kargatzeko ere erabili ohi den normalean.

Era berean, autoak biltegiratzen ari dira Santanderko Portuko instalazioetan, eta horrek arazo bat sortzen dio zuzendaritzari, Volkswagen Nafarroa enpresak ordaindu beharreko plazak baitira.

Mundu osoko automobil instalazioei eragiten dien egoera honek erdieroaleen hornikuntza faltarekin du zerikusia. Arrazoi horrengatik, azken hilabeteetan hainbat egunetan ekoizpena bertan behera utzi behar izan d ute.

Enpresako zuzendaritzak adierazi du «ziurgabetasun eta ezegonkortasun egoera» honen ondorioz ekoizpen egutegia astero zehazten dela, lehen egiten zen bezala, lau astetik behin zehaztu beharrean.