Amaiurko batailaren urteurrenaren ospakizunen amaiera ekitaldia egin dute nafar Parlamentuan
Nafarroako Parlamentuak ekitaldia egin du larunbat honetan, Amaiurko batailaren 500. urteurrena ospatzeko antolatu diren ekitaldietan auzolanetik parte hartu duten eragile eta pertsona guztiak omentzeko helburuarekin.
Amaiurko batailaren 500. urteurrena ospatzeko ekitaldiari amaiera egin dute larunbat honetan Nafarroako Parlamentuan. Amaiurreko herriak, hainbat kultur ekintza eta ekimenen bitartez, bere gazteluak Nafarroako erresumaren konkistaren eta ondorengo gazteluaren suntsiketaren aurrean izan zuen erresistentziaren bosgarren mendeurrena ospatu du aurten.
Unai Hualdek, Nafarroako Parlamentuko presidenteak, ekitaldiari hasiera eman dio, eta oroitzapen-ekitaldi guztietan parte hartu duten pertsonei eta Amaiurko herri osoari beren historia eta oroimena berreskuratzeko egin duten lanagatik esker ona adierazi die.
Era berean, Hualdek auzolanaren indarra azpimarratu du, Amaiurko herriak balioan jarri duen gure lurraldeko zerbait, erakundeei bide bat erakutsiz, eta Aranzadi Zientzia Elkarteari egindako lana eskertu nahi izan dio, zientzia-, historia- eta kultura-ondarea kontserbatzen eta balioan jartzen egindako lanagatik, gaur egun bizi dugun gizartea ulertzeko erreferentzia gisa.
Jarraian, Juantxo Aguirrek, Aranzadi Zientzia Elkarteko idazkari nagusiak, Amaiur 1522-2022 fotoliburua aurkeztu du, 1922 eta 2022 urteen artean Amaiurri buruzko narratiba grafikoa egiten duen argitalpena, Amaiurrek eta bere Gaztelu Elkarteak antolatutako ekitaldiak ardatz dituena.
Aguirrek eskerrak eman dizkie argazkien egileei, taldearekiko eta pertsonekiko 100 urteko historia erakusten baitute. Argitalpen hau baliagarria izan dadila etorkizuneko belaunaldiek gure herriaren memoria grafikoak lantzen jarrai dezaten, amaitu da.
Ondoren, Iker Ibero ingeniari eta kultur ondareko 3D birsorkuntzetan adituak Amaiurko gazteluaren 3D birsorkuntza aurkeztu du. Erreplika honek Amaiurko gaztelua bere bi une historikoenetan erakusten du, Erdi Aroko gaztelua 1512an zegoen bezala eta gaztelua bastioi eta artilleriako plataforma berriekin, 1522an zegoen bezala.
«Ohore handia izan da historia honetan nire aletxoa jartzea», aitortu du egindako birsorkuntzaren egileak, xehetasunez, Aranzadi Zientzia Elkartearen ikerketa arkeologikoei eta Aitor Pescador historialariak egindako lan dokumentalari esker. Azken horiek fidagarritasuna eta errealismoa eman diote lanari, eta publiko guztiarentzat dago eskuragarri Amaiurko museoaren webgunean.
Aitor Pescador historialariak, ildo beretik, biziki eskertu du gaztelu honen ikerketan parte hartu izana, bereziki interesgarria baita historialarientzat eta arkeologoentzat, Nafarroako Erresumaren nortasunaren erreferentea baita.
Ekitaldia Anabel Arraizak aurkeztu du, eta Atrioan izan dira, besteak beste, Maiorga Ramirez, Legebiltzarreko Mahaiko bigarren idazkaria, Blanca Regulez, Maria Solana (Geroa Bai), Adolfo Araiz, Arantza Izurdiaga (EH Bildu), Ana Ollo, Herritarrekiko Harremanetako sailburua, Mikel Irujo, Ekonomiaren Garapen eta Enpresa sailburua, Koldo Martínez, Senatari Autonomikoa, Bingen Zupiria, Lakuako Kultura sailburua, Aitor Esteban (EAJ), Kongresu espainoleko diputatua, Xabier Ezeizabarrena, Gipuzkoako Batzar Nagusietako presidentea, Ana Otadui, Bizkaiko Batzar Nagusietako presidentea eta Andoni Ortuzar, EAJko presidentea.