Lau adingabe atxilotu dituzte Donostiako portuan bi zaindariri eraso egiteagatik

Bi segurtasun-zaindariri eraso egin diete bart Donostiako portuan eta Ertzaintzak lau adingabe atxilotu ditu. Ikerketa irekita dago gainerako erasotzaileak identifikatu ahal izateko. Bi langileak ospitalean artatu behar izan zituzten erasoaren ondoren.

Lau adingabe atxilotu dituzte igande goizaldean Donostian, portuko bi segurtasun-zaintzailek jasandako talde-eraso batean parte hartzeagatik, Lakuako Segurtasun Sailak jakitera eman duenez. Goizaldeko ordu batak aldera gertatu da erasoa.

Donostiako Alde Zaharrean zeuden hainbat pertsonak bi segurtasun-langileak erasotuak izaten ari zirela ikusi eta polizia ohartarazi zuten, gerturatu zedin. Inguruan zegoen patruila bat bertaratu eta portuko bi segurtasun-arduradunak bertan aurkitu zituen, hainbat kolpe zituztela, jakitera eman dutenez.

Azaldu dutenez, zaindariek hainbat gazteri errieta egin zieten beren jarrera zela eta, ontzietara botilak jaurtitzen ari zirelako. Antza denez, une horretan gazte taldea eraso egiten hasi zitzaien «ostikoak eta ukabilkadak emanez, lurrera bota arte, eta soinean zeramatzaten gomazko defentsaren bat eta girgiluak ere lapurtu zizkieten», adierazi dutenez.

Bi zaintzaileak Donostia Ospitalera eraman behar izan zituzten, zituzten zauriak artatzeko. Jarraian, Ertzaintzako agenteek ingurua miatu zuten, eta lau gazte aurkitu zituzten, guztiak adingabeak, ustez erasoan inplikatuak daudenak.

Beharrezko egiaztapenak egin ondoren, susmagarriak atxilotu eta ertzain-etxera eraman zituzten, beharrezko eginbideak egiteko eta, ondoren, Adingabeen Fiskaltzaren esku uzteko. Ikerketak zabalik jarraitzen du, delitu horretan inplikatutako gainerako pertsonak identifikatu ahal izateko.