Hezkuntza arloan Lakuak eta LABek sinaturiko akordioaren kontra azaldu da ELA

Hezkuntza arloan Lakuako Gobernuak eta LABek sinatu duten akordioaren kontra azaldu da ELA «arazoak konpontzen ez dituelako eta langileen eskaerei ez dielako erantzuten», agerraldi batean azaldu duenez.

Hezkuntza arloko langileen lan baldintzen inguruan Lakuako Gobernuak eta LABek lortu duten akordioaren kontra azaldu da ELA, «ez dituelako konponduko Hezkuntza Legeak dituen gabezia eta mugak».

ELAk Bilbon egindako agerraldian gogorazi duenez, bi greba egun deitu ziren lege honen gabeziak salatzeko. LABekin Lakuak lorturiko akordioak «ez dituela arazo horiek konponduko, ezta langileen eskaerei erantzungo» uste du ELAk.

Pello Igeregi (ELAren Negoziazio Kolektiboaren arduraduna) eta Miren Zubizarreta (sindikatu honetako Hezkuntza arduradua) kritiko agertu dira akordioaren edukiekin, «ez dituelako lanpostuak bermatuko, behin-behinekotasuna betikotuko duelako, langileak pobretuko dituelako eta euskarari kalte egingo diolako».

Honekin batera, LABek akordio hau gutxiengoan sinatu izana leporatzen dio ELAk, sektore desberdinetan jorra daitezkeen edukiak mugatzea bilatzen duela gaineratuz.

«ELAri oso larria iruditzen zaio LABek negoziazio mahai desberdinetara eraman ahal izango diren edukiak mugatu nahi izatea, mobilizazioa oztopatzeko asmoz». Horregatik, gaineratu du ez dituela muga horiek onartuko eta jarraituko duela «lan baldintzen zein Hezkuntza ereduaren eraldaketaren aldeko mobilizazio eta grebak bultzatzen».

Gauzak horrela, asteazken honetan, hilak 7, agerraldia egingo du ELAk Gasteizko Parlamentuaren aurrean; langileei ere elkarretaratzean parte hartzeko deia egin die.