Eusko Ikaskuntzaren XIX. Kongresuko kartela egiteko deialdi publikoa ireki dute

Eusko Ikaskuntzak deialdi publikoa egin du irailaren 10era arte 2024an ospatuko duen XIX. Kongresuko kartela osatzeko proposamenak aurkezteko. 1.500 euroko sari bakarra jasoko du kartel irabazlearen egileak.

Eusko Ikaskuntzak kartel lehiaketarako deialdia egin du, 2024an egingo den Eusko Ikaskuntzaren hurrengo Kongresua iragartzeko. Ekainaren 9an ireki zuten kartelak bidaltzeko beta eta irailaren 10era arte egongo da irekita proposamenak aurkezteko epea. 1.500 euroko sari bakarra jasoko du kartel irabazlearen egileak.

‘Elkartzen gaituena’ lelopean, Eusko Ikaskuntzaren XIX. Kongresua egingo dute Gasteizen, 2024ko urriaren 3, 4 eta 5ean. Hain zuzen ere, Kongresuaren berri eman beharko da lehiaketara aurkeztuko dituzten karteletan. Artista bakoitzak bi obra aurkeztu ahal izango ditu gehienez, eta derrigorrez originalak eta argitaratu gabeak izan beharko dira. Proposamenak paperean nahiz euskarri informatikoan aurkeztu ahal izango dira, betiere egileen identifikaziorik gabe.

Lau kartel finalista hautatuko ditu epaimahaiak, eta horien artean aukeratuko da irabazlea. Horretarako, epaimahai aditu batek bozketa egingo du, sormena, kalitate grafiko eta plastikoa, ikusgarritasuna eta erreproduzitzeko eta editatzeko erraztasuna kontuan hartuta. Era berean, Eusko Ikaskuntzako bazkideek bozketa birtualaren bidez parte hartuko dute kartel irabazlearen aukeraketa prozesuan.

Eusko Ikaskuntzak bere webgunean argitaratu ditu lehiaketa honen oinarriak.