Amurrioko Tubos Reunidos enpresan beste ABEE bat ezarri nahi dela salatu du ELAk

Indarrean dagoen eta otsailean amaituko den ABEEari jarraipena eman nahi dio Tubos Reunidos enpresak, ELA sindikatuak baieztatu duenez. «Aldi baterako enplegu espedienteez baliatu nahi du langileen baldintzak ahultzeko, eta etekinak maximizatzeko», salatu du sindikatuak.

Tubos Reunidos enpresak Amurrioko enpresa batzordeari jakinarazi dio enplegua aldi baterako erregulatzeko beste espediente bat aurkeztu duela, udan hasi eta otsailean amaituko den egungoaren jarraipen gisa, ELA sindikatuak jakinarazi duenez. Kontsulta aldiko lehen bilera otsailaren 9an izango da.

ELAk «enpresaren 2023ko itxierako emaitza ekonomikoen zain, onura handikoak izatea espero direnak», uste du enpresak «bere estrategiari eutsi» diola. «Aldi baterako enplegu espedienteez baliatu nahi du langileen baldintzak ahultzeko, eta etekinak maximizatzeko», azpimarratu du ohar baten bidez.

Zentzu horretan, gogora ekarri du Tubos Reunidos enpresak «54,5 milioiko irabazi garbia» izan zuela 2023ko lehen seihilekoan, «iaz aldi berean baino 52 milioi gehiago». «Negozio zifra 333 milioira iritsi zen, aurreko urtean baino % 36 gehiago. Azkenik, Tubos Reunidosek % 160ko errebalorizazioarekin itxi eta lideratu zuen burtsa 2023an», zehaztu du sindikatuak.

Hori dela-eta, ELAk «horrelako enpresa estrategiak» salatu nahi izan ditu, «galerak sozializatzen dituelako eta etekinak pribatizatu». Aurreko ABEEaren aurkako helegitea jarri zuen ELAk, eta Gasteizko lan arloko epaitegiaren epaiaren zain dagoela baieztatu du.

«ELAk konpromisoa hartzen du ABEE berri honetan Tubos enpresako langileen interesak defendatzeko eta enpresaren zikoizkeria salatzeko», adierazi du sindikatuak.