Aitor Elordi: egungo aurrelari txapelduna, erantzun baino galdera gehiagorekin

Aitor Elordik onartu du bikote bezala zalantzak sortu dizkiela azkenaldiko bolada txarrak eta uste du partidetan «erasoan gehiago aritzea» falta zaiela, denborarik gehienean defentsan aritu behar izaten ari direlako bera eta Rezusta.

«Bikote moduan sentsazioak onak ez direnean eta puntuak ez dituzunean batzen, azkenean zurrunbilo batean sartzen zara, normala baino galdera gehiago egiten hasten zara zure buruari eta bolada txar hau ahalik eta arinen iraultzen saiatu behar dugu eta horretan gaude zentratuta». Hausnarketa, oraintxe erantzun baino galdera gehiago dituen Aitor Elordik egindakoa da, Tolosan, asteleheneko partidarako material aukeraketaren ostean. Agian kasualitate bat baino ez zen izan eta saskian ere ez zegoen bilatutakoa, baina «inoiz baino gehiago» kosta zitzaien asteartean astelehenerako pilotak apartatzea, Rezustarekin osatzen duen bikotea aspaldiko egoerarik latzenean direnean.

«Dena buruz behera jartzen ari zaigu, txapelketa halako ondo hasi genuenean. Orduan ere esaten genuen, ondo hasi baino, hobea izaten dela hobeto amaitzea. Oraindik ez da txapelketa bukatu baina egia da guk nahiko genukeena baino okerrago gabiltzala eta ea geratzen zaizkigun bi partidetan puntutxo bat ateratzen dugun, ze bestela asko zailduko zaigu kontua», gaineratu zuen mallabitarrak.

«Ea geratzen zaizkigun bi partidetan puntutxo bat ateratzen dugun, ze bestela asko zailduko zaigu kontua»

Irregulartasun handiegia

Lehen hiru partidak irabazita, bikain ekin zioten Binakakoari bizkaitarrak eta Beñat Rezustak, baina ordutik aurrera beste bi partida baino ez dituzte irabazi: Laso-Arangurenen aurka Bilbon zazpigarrenetan eta Peio Etxeberria-Zabaletaren aurka hamargarrenean, eta sei lehenengoetan egotea ere dute, momentuz, bermatuta. «Gauza batzuk okertu egin dira, partida batzuk egon dira agian jokatu aurretik puntuarekin kontatzen genuenak, gure maila eman ez eta aurkarien merituz puntu hori galdu ditugunak. Egia da baita ere pilotariak kantxan izaten ditugun sentsazioez asko gidatzen garela eta egon dira partidak Beñat atzean ez dena eroso sentitu eta ni aurrean bai eta alderantziz; Beñat sendo egon denean ni ibili naiz joko mailatik behera eta nik uste hor egin digutela ihes beste puntu batzuk», azaldu zion NAIZi mallabitarrak, txakalaldiari arrazoi konkretu bat topatu ezinik.

Izan ere, tarte horretan Peio Etxeberria-Zabaletari Mungian irabazteko gai izan ziren eta Errege egunez Astelenan Altuna-Martijaren aurka galdu arren, sekulako maila erakutsi zuten, ziurrenik orain arteko txapelketako partidarik ikusgarrienean. «Horrek esan nahi duena da gu ere zalantzekin gabiltzala, momentu batzuetan ematen dugu gure maila, ze azkenean hor goran dabiltzan bikoteen aurka irabaztea lortu dugu, Peio-Zabaletari esaterako, baina gero, hurrengoan beheko postuetan dabiltzanen aurka galdu egin dugu eta horrek esan nahi du gu ere ez gaudela gure %100ean. Seguru kantxan zalantzekin gabiltzala, azkenean sailkapena izaten da horren erakusgarria eta esandakoa, orain arteko ahaztu eta falta denari aurre egin, oraindik garaiz gabiltzalako, gure esku dagoelako eta ea falta zaigun puntu hori lortzen dugun».

Euren beheraldiaren diagnostiko zehatzik egiteko gai ez den arren, mallabitarrak badu azkenaldian gertatzen ari zaienaren ideia bat. «Azkenaldian gertatzen ari zaiguna da lehen parte horretan bai eusten diogula partidari, gu erasoan aritu baino, erdaraz esaten den bezala "a remolque" joanda lortzen dugu partidari eustea eta aurkariek ihes egin barik egotea, baina gero heltzen da bigarren zati hori eta aurkariek, asko egin barik, ihes egiten digute eta hor joaten zaizkigu partidak. Azkenean lortu behar duguna da, beste bikoteek gure aurka lortzen duten moduan, erasoan jokatzea partidak aurrera ateratzeko. Erasoan jokatu behar dugu eta horren bila irten behar dugu, ea nik aurrean erritmo pixka bat sartzen dudan eta Beñatek pilota atzeratzen duen».

«Erasoan jokatu behar dugu eta horren bila irten behar dugu, ea nik aurrean erritmo pixka bat sartzen dudan eta Beñatek pilota atzeratzen duen»

Pilota borobila dela eta pilotariek azkar ikusten dituzte kirol honen bi aldeak, iaz garai honetan esne mamitan zen bizkaitarra eta urteko txapelik garrantzitsuenetako bi eskuratu zituen eta ordutik bere mailarik onena berreskuratu ezinik ari da. «Pilotak halakoak ditu, lehen justu Beñatekin komentatzen aritu gara nola iaz ligaxkan hirugarren sailkatu ziren –Peio Etxeberriarekin aritu zen Rezusta–, play-offeko lehen partidan 21-19 irabazten joan ziren, finalerdiak tanto bakarrera izan zituzten, partida hura galdu, igandean play-offetako bestea ere galdu eta etxera txapelketa on bat eginda, ze hirugarren sailkatu baziren txapelketa on bat egin zutelako izan zen. Ea kasu honetan alderantziz den, kili-kolo amaitu tarte hau eta gero zorte pixka batekin finalerdietarako sailkatu».

Zalantza ekaitz honetan, gauza bat behintzat nahiko argi dauka Aitor Elordik, kantxara gorriz irteteak ez dio inolako kalterik egiten. «Ez dut uste horrena denik, beti komentatu izan dizkidazue txapeldun izatearen presioaren gorabehera horiena, baina egia esanda, ez nabil horri bueltaka. Nire joko maila berreskuratzean nago zentratuta».