EH Bilduren oinarrien babes zabala lortu dute Kortajarenaren eta Blancoren hautagaitzek

EH Bilduko oinarrien %96,2ren babesa jaso du Nerea Kortajarenak talde parlamentarioaren bozeramaile gisa; eta kideen %85,9rena Eba Blancok, Gasteizko Legebiltzarreko presidentea izateko.

EH Bilduren oinarriek berretsi egin dute Nerea Kortajarena talde parlamentarioaren bozeramaile izendatzeko zuzendaritzaren proposamena, %96,2ren babesarekin, baita Eba Blanco Gasteizko Legebiltzarreko presidentegai izateko proposamena ere, kideen %85,9arekin.

EH Bilduren oinarriek lehen aldiz Gasteizko Legebiltzarreko presidentegaia eta taldeko bozeramailea aukeratu dituzte hauteskunde autonomikoak egin aurretik, azaldu du koalizio independentistak ohar baten bidez.

Ostiral eta larunbat eguerdi bitartean egindako bozketek babes handia eman diote Nerea Kortajarenari, EH Bilduren talde parlamentarioaren bozeramaile gisa, botoen % 96,2rekin.

Eba Blanco EAko idazkari nagusiaren babesa apur bat txikiagoa izan da, EH Bilduko militanteen %85,9ren babesa jaso baitu.

Kortajarena (Donostia, 1974) 2016tik da legebiltzarkidea eta EH Bilduko bozeramailea, Maddalen Iriartek Gipuzkoako zerrendaburua izateko lekukoa eman zionetik.

Kortajarena Gipuzkoako zerrendaburua da, talde parlamentarioko koordinatzaile politikoa izan da eta EH Bilduko Mahai Politikoko kidea da.

Eba Blanco (Amurrio, 1973) Eusko Alkartasuneko idazkari nagusia da, eta EH Bilduko legebiltzarkidea 2012tik, gizarte politiketan eta osasun arloan bozeramaile.

2016tik EH Bildu ordezkatzen du Legebiltzarreko Mahaian presidenteorde karguarekin eta koalizioaren Mahai Politikoa ere osatzen du.