Erostarbek postu onean jarraitzen du Balliton final-laurdenetara iritsi ostean

Gaur amaituko da Hegoafrikako Ballito hondartzan egiten ari diren Challenger Series itzuliko hirugarren txapelketa. Nadia Erostarbe zarauztarrak final-laurdenetera heltzea lortu zuen eta, ondorioz, ranking orokorrean postu onean jarraitzen du.

Gaur amaituko da Balliton (Hegoafrika) Challenger Series itzuliko hirugarren txapelketa; beraz, CS rankingeko postuak oraindik zehazteke daude, baina suerta daitezkeen aukera desberdinak kontuan hartuta, final-laurdenetara iritsi zen Nadia Erostarbe zarauztarrak CS rankingean postu oso onean jarraituko duela aurreikus daiteke.

Erostarbe ez zen izan Balliton lehiatu zen euskal surflari bakarra. Janire Gonzalez Etxabarri, Ariane Ochoa, Tiago Carrique eta Kai Odriozola ere izan ziren Hegoafrikako txapelketan, baina ez zuten lortu zarauztarrak bezain emaitza ona. Izan ere, kontuan hartu behar da CS mailan dauden 80 mutil eta 48 nesken artean lehia oso gogorra izaten dela eta maila oso ona dela. Horren adierazgarri da urte hasieran lehen mailan lehiatzen ziren zenbait surflarik ere parte hartzen dutela.

Azken egunetan metro bat eta bi metro arteko olatu labur eta indartsuak izan dira Ballitoko hondartzan, eta gaurko antzeko zerbait espero da. Baldintza zailak dira, surflariak oso azkar egin behar baititu ariketak olatu gainean, baina baldintzak berberak dira lehiakide guztientzat.

Ballitoko hondartza Durban hiritik nahiko gertu dago, Hegoafrikako ekialdean, eta ordutegia Euskal Herriko bera da; beraz, irakurleak txapelketa zuzenean ikusi nahi badu, gaur goizean zehar WSLko webgunean sartu besterik ez du. Mutilen zein nesken finalerdiak eta finalak egitea bakarrik falta da; hortaz, ez da asko luzatuko txapelketa.

Erostarbe Postu onean

Maiatzetik urrira bitartean egin ohi diren CS mailako sei txapelketetatik hirugarrena zen Ballitokoa. Hala, beste hiru txapelketa falta dira hurrengo urtean lehen mailara igoko diren bost neskak eta hamar mutilak izendatzeko. Oraindik gauza asko gerta daitezke hurrengo txapelketen ostean, baina jada hiru emaitza on eskuratzea hasiera bikaina da, denboraldiaren amaieran lau emaitza hoberenak hartzen baitira kontuan. Ondorioz, Erostarbek denboraldia bikain hasi duela esan daiteke, eta beste euskal lehiakideen kasuan, ostera, rankingean gora egiteko oraindik beste hiru aukera dituztela nabarmendu behar da.

Aurtengo denboraldian egin diren hiru txapelketetatik bitan final-laurdenetara iritsi da Erostarbe eta hirugarrenean finalerdietan izan zen. Sekulako emaitzak dira; kontuan hartu behar da iaz zarauztarra lehiatu zen CS mailako lehen txapelketa, hain zuzen, Ballitokoa izan zela, eta final-laurdenetara iritsi zen. Euskal surflari batek CS mailan inoiz lortu zuen emaitza hoberena zela nabarmendu genuen orduan, baina ordutik beste hiru final-laurdenetara eta bi finalerditara iritsi da.

Erostarberen helburua rankingeko lehen bost postuetako batean mantentzea da. Ballitoko txapelketara laugarren postuan iritsi zen eta baliteke txapelketa amaitu ostean ere lehen bost postuetako batean jarraitzea.

Finalerdietara iritsi diren lau lehiakideen artean badira bi, txapelketa irabazten badute ere, Erostarberen postura iritsiko ez direnak; alegia, Sophia Medina eta Tessa Thyssen. Alta, Bella Kenworthyk edo Vahine Fierrok irabazten badute, Erostarbe bosgarren postura edo seigarrenera jaits liteke. Kasurik txarrena Kenworthyk irabazi eta Fierro bigarren postuan geratzea litzateke, kasu horretan Erostarbe seigarren postura jaitsiko bailitzateke. Edonola ere, postu onean jarraituko du rankingean zarauztarrak Ballitoko txapelketaren ostean.

Gainerako euskal ordezkariei dagokienez, Janire Gonzalez Etxabarriren debuta azpimarratu behar da. Zumaiarrak aurten CS mailan lehiatzeko plaza eskuratu zuen, baina lesio baten ondorioz ezin izan zuen Australian egin ziren denboraldiko lehen bi txapelketetan parte hartu. Ballitokoa izan zen bere lehen txapelketa eta nahiko emaitza ona lortu zuela esan daiteke, hirugarren errondara iristea lortu baitzuen.

Nesken kategorian lehiatu zen beste euskal surflaria Ariane Ochoa izan zen. Bilbotarrak bizkarkako bira indartsuak egin zituen olatu zailetan, baina ez zuen bigarren erronda pasatzea lortu. Hala ere, bost postu egin ditu gora ranking orokorrean eta 28. postuan kokatu da.

Mutilen kategorian, ostera, Kai Odriozola donostiarra eta Biarritzen bizi den Tiago Carrique lehiatu ziren, baina hauek ere bigarren errondan kaleratuak izan ziren.
 
Lehen maila helburu

CT zirkuitua osatzen duten 10 txapelketetatik 8 eginak dira; beraz, abuztuan Fijin egingo den txapelketa eta irailean Kalifornian egingo den Final Handia soilik falta dira aurtengo lehen mailako itzulia amaitzeko. Alta, kontuan hartu behar da Bosgarren txapelketaren ostean lehiakide kopurua erdira jaitsi zela eta kaleratuak izan ziren lehiakideak bigarren mailara jaitsi zirela. Ordutik CS mailan lehiatzen dira hurrengo urtean lehen mailan toki bat eskuratzeko.

Ballitoko txapelketan, adibidez, Erostarbek hirugarren errondan kaleratutako Luana Silva brasildarrak lehen mailara igotzea lortu zuen, baina ez zuen erdietsi denboraldi erdiko langa gainditzea eta orain CS mailan lehiatzen da berriz ere CT-ra igo ahal izateko.

Beraz, lehen mailatik kaleratuak izan diren lehiakideak eta CS mailara igotzea lortu duten lehiakideak elkarrekin lehiatzen dira CS mailan; guztira 80 mutil eta 48 neska, eta guztien helburua berbera da, lehen mailara igotzea.

Bestalde, bigarren mailara igotzea ere ez da erraza, lehiakide bakoitzak bere erregioko QS zirkuituan postu on bat eskuratu behar baitu. Nadia, esaterako, ez zuen lortu Europako QS rankingean sailkatzea, ez baitzegoen lehen 4 postuetan; baina, gonbidapen wildcardei esker, CS mailan lehiatu ahal izan zen eta, emaitza onak lortu zituenez, aurten CS mailan lehiatzeko plaza bat eskuratu zuen.

Europako QS rankingeko lehen zazpi mutilak eta lau neskak sailkatzen dira CS mailarako. QS itzuliko azken txapelketa apirilean egin zen eta horren ostean sailkatu ziren Europako ordezkariak. Horien  artean ziren Janire Gonzalez-Etxabarri, Kai Odriozola eta Tiago Carique. Bestalde, Ariane Ochoa ez zen sailkatu, baina postu onean geratu zenez, hutsik geratzen diren plazak betetzeko aukera du eta horrela lehiatu ahal izan da orain arte egin diren CS zirkuituko hiru txapelketetan. Arazoa da Ochoak ez dakiela azken unera arte txapelketa batean lehiatu ahal izango den.