Oier Ibarretxeren kemena itzali duen borroka

Oier Ibarretxe boxeolari galdakoztarraren ibilbide olinpikoa hasi eta berehala bukatu da, final hamaseirenetako lehia galdu egin baitu Kazakhstango Bazarbay Uulu Mukhammedsabyr-en aurka. Puntuetan galdu du, 5-0ko markagailuarekin. 

Ilusioa borborka zuen Oier Ibarretxe galdakoztarrak, ezustekoa emateko prest ikusten zuen bere burua Olinpiar Jokoetan, bere aurreneko hitzordu olinpikoan. Sekulako denboraldia egin du bizkaitarrak –azaroan Europako txapelduna 22 urtez azpikoetan eta maiatzean, Pariserako txartela eskuratuta– baina hiriburu frantsesean, debuteko borrokan kale egin du.

Ez du bere sentsazioekin bat egin, txanda guztiak menderatu ditu Kazakhstango Bazarbay Uulu Mukhammedsabyr borrokalariak eta hala, puntuetan 5-0ko markagailuarekin galdu du Ibarretxek. 

Lehendabiziko ‘round’-ean, hasierako minutuetan, kolpe batzuk elkartrukatu dituzte baina, gutxika-gutxika, kazajistango boxeolariak presentzia irabazi du ring gainean. Bigarren erasoaldian urrats bat emateko beharra ikusi du Ibarretxek eta distantzia labur eta ertainean kolpe batzuk eman ditu, baina ez dira nahikoak izan epaileen arabera.

Hirugarren eta azken ‘round’-ean, Ibarretxeren saiakerak kontrolatzera mugatu da Mukhammedsabyr eta galdakaoztarraren kemena itzaltzen joan da, apurka-apur.a

Helburu handia jarri zion bere buruari, dominen borrokan egotea. Erronka handia da hori eta ilusioa bazuen, hala adierazi zuen NAIZi emandako elkarrizketan. 21 urte besterik ez dituela egin du debuta Olinpiar Joko batzuetan eta nolabait, historia ere egin du, hiru hamarkada pasa baitira hitzordu olinpikoan boxeoan lehiatu zen azken euskaldunetik.