Zibersegurtasuna eta komunikazio aurreratuak garatzeko laborategi berria Arrasateko campusean
Cisco konpainiak eta Mondragon Unibertsitateko Goi Eskola Politeknikoak komunikazio-teknologia aurreratuei eta zibersegurtasunari buruzko laborategia inauguratu dute, Arrasateko campusean, prestakuntza teknologikoa bultzatzeko eta industriarekiko lankidetza sustatzeko.
Laborategi teknologiko berria Ikusi eta Sernivel3 enpresen –Ciscoren Euskadiko partner ofizialen– lankidetzarekin gauzatu da, eta erreferentziazko gune izan nahi du, bai Mondragon Unibertsitateko ikasleak prestatzeko, bai enpresa-ekitaldiak egiteko. Mondragon Unibertsitateko Goi Eskola Politeknikoaren 11. eraikinean zabaldu da laborategia, eta Ciscoren azken teknologiez hornituta dago.
Telekomunikazio ekipoetan aditua den Cisco konpainiaren azken teknologiak eskura izanda, ikasleek funtsezko arloetan trebatzeko aukera izango dute, hala nola zibersegurtasunean, komunikazio-sareetan eta IoT (Gauzen Internet) sistemak industria-inguruneetan txertatzeko prozeduretan. Izan ere, teknologia horiek oinarrizkoak dira 4.0 industriarako. Enpresek ere eskura izango dute laborategia, industriarako irtenbide teknologikorik aurreratuenak ezagutzeko; besteak beste, Adimen Artifiziala, ertzeko konputazioa eta biki digitalak, baita mantentze-lan prediktiboa, zero trust segurtasuna eta beste metodologia batzuk ere.
Laborategiak agenda dinamiko bat izango du, eta hainbat jarduera antolatuko ditu unibertsitatea eta enpresak elkarri lotzeko. Hala, 4.0 industriarako bideratutako ekitaldi teknikoak egingo dira sei hilean behin, eta horietan Ciscoko adituek hartuko dute parte, adimen artifizialari eta punta-puntako antzeko teknologiei buruzko hitzaldiak eginez. Era berean, hiru hilean behingo mahai-inguruak eta networking ekitaldiak egingo dira sektoreko profesionalekin. Gainera, Cisco konpainiako adituek ikastaro espezializatuak emango dituzte, eta Unibertsitateko ikasleei eskola magistralak eskainiko zaizkie. Azkenik, bestelako ekimenak ere aurreikusten dira; esaterako, hackatoiak eta ko-sorkuntzako ekitaldiak.
APUSTU ESTRATEGIKOA
Laborategia martxan jartzea apustu estrategiko handia da Mondragon Unibertsitatearentzat; izan ere, alde batetik, punta-puntako teknologietan trebatutako profesionalak sortzeko gaitasuna indartu ahal izango du eta, bestetik, euskal enpresa-sarearekiko lotura hobetu. Gune berriarekin, berrikuntza teknologikoko erreferente-izaera sendotu nahi du Unibertsitateak. Ildo beretik, funtsezko bazkide bilakatu nahi du industria-prozesuetan zibersegurtasuneko, komunikazio-sareetako eta IoT arloko irtenbiderik berrienak erabili nahi dituzten enpresentzat.
Laborategiaren inaugurazio ekitaldia azaroaren 6an egin zen eta bertan Ciscoko eta Mondragon Unibertsitateko hainbat ordezkari izan ziren, baita beste erakunde batzuetako arduradunak ere. Besteak beste, Gonzalo Garcia (Ciscoko lurralde-mailako kontu-kudeatzailea), Nieves Hevia (Ciscoko salmenta-zuzendaria), Jose Iglesias (Ikusi Españako zuzendari nagusia) eta Carlos Pindado eta Isabel Artaza (Sernivel3ko kudeatzailea eta zuzendari nagusia, hurrenez hurren).
Cisco konpainiak eta Mondragon Unibertsitateak 24 urte daramatzate elkarlanean, komunikazio-sareei eta zibersegurtasunari buruzko prestakuntza ematen.