Etxebizitza turistikoen lizentziak aldi baterako mugatzea proposatu die Eudelek udalei

Etxebizitza eta logela turistikoak arautzeko oinarri komunak bidali dizkie Eudelek Araba, Bizkai eta Gipuzkoako 33 udali. Bertan, beste neurri batzuen artean, ostatu mota hauen jarduera-lizentziak aldi baterako mugatzeko aukera jaso du.

Eudelek Araba, Bizkai eta Gipuzkoako udalei proposatu die etxebizitza eta logela turistikoen jarduera lizentzien baimena aldi baterako mugatzeko aukera ezarri dezaten, turismo erabilerarako eskubidea finkatu gabe. 

Orientabide hau, beste batzuen artean, EAEko udalen elkarteak egindako gida batean jasotzen da. Honen bidez, hirigintza plangintzan erabilera turistikoa arautzeko zenbait oinarri komun eta orientabide ematen dira, bereziki etxebizitza eta logela turistikoen kasuan.

Gainera, kopuruan eta ehunekoetan mugak ezartzea, tentsio guneetan etxebizitza turistikoen egoera aztertzea, etxebizitzak eta logelak bereiztea, arauz kanpoko etxebizitzetan eta udal etxebizitza tasatuetan erabilera hau baztertzea, beste ostatu eta bizitegi modalitate batzuk malgutzeko aukera ematea, landa guneetan ere araudia ezartzea eta administrazio guztiek baimenen koordinazioa hobetzea planteatu die Eudelek 33 udali.

Azaldu dutenez, turismo ostatuen modalitate berriak antolatzeko beharrari erantzuteko egin da gida hau, udalerrietan koordinatuta eta tokiko autonomia abiapuntu hartuta, udal bakoitzak bere diagnostiko eta bere udalerriaren beharretara egokitutako erregulazioa egin dezan.

Eudeleko lehendakari eta Derioko alkatea den Esther Apraizek adierazi duenez, «Euskadiko udalerrietan turismo jasangarriaren eta kalitatezkoaren eredu bat bultzatzeko aukera-aukerako unean gaude. Eta udalok, gure hirigintza eskumenak baliatuta, aurrea har dezakegu, bai etxebizitza eskubidea eta bai zerbitzu publikoekiko oreka babesteko erregulazio egoki batekin. Turisten eta gure herrietako biztanleen arteko elkarbizitza bermatzeko, herritarren eguneroko bizitza aldatu gabe.

Lan honekin, Gasteizko Legebiltzarrak egindako eskaerari erantzun dio, eta erakundeen arteko lankidetzaren testuinguru horretan, joan den astelehenean, Esther Apraizek bilera bat izan zuen Javier Hurtado Lakuako Turismo, Merkataritza eta Kontsumo sailburuarekin, dokumentua Sailari aurkezteko.

Eudeletik adierazi dutenez, gaur egun bi aukera daude indarrean dagoen araudiaren arabera: erabilera turistikoa jasotzea egoitza erabileren barruan edo hirugarren sektoreko erabilera gisa. Dokumentuak bi aukera horiek sakon aztertzen ditu, udal bakoitzak bere udalerrirako formularik egokiena diseina dezan.

Eudelen orientabideak honako hauetan oinarritzen dira: 2024ean egindako azterlan «zorrotz» batean, 33 udalerrietan turismo erabilera arautzeari buruzkoa; etxebizitza turistikoek eta logela turistikoek EAEn izan duten bilakaeraren azterketa; eta egoeraren eta araudien konparazioa Europako beste autonomia-erkidego eta herrialde batzuekin eta AEBekin.