!!! Irakurri baino nahiago baduzue entzun, hemen Info7 irratian egin dugun errepasoa testu hau oinarri:

Aste motza izan da zorte pixka bat izan dugunontzat, zazpi egunekoa hau ere, noski, baina aldrebesa. Pasa den asteburutik datorkigu zer esan gehien eman duen momentuetako bat. Zenbatetan eta zenbatek errepikatu ote du «denak berdinak dira» Espainiara begira jartzean, ez genuen uste horren adierazgarri erakutsiko zutenik:

Enorme Antonio Hernando, desenmascarando la miseria de Gabriel Rufián. le ha aplaudido hasta la bancada del PP pic.twitter.com/TMMyVsBlLw

— (((LaVerdadOfende ن (@verdadesofenden) October 29, 2016

Txaloka elkarrekin PPkoak, PSOEkoak, Ciudadanosekoak... eta baita jeltzaleak ere. Estatu egituraz eta hauen baitako alderdiez hitz egitean gogoan gordetzeko irudia, zalantzarik gabe. Hau dena zergatik? Asteon NAIZen gehien ikusi den bideo honetan jasotako hitz hartzeagatik. Gabriel Rufian kataluniarra, berriz, egia borobilekin eserita eroso direnak aztoratuz:

Emaitza badakizue, Mariano Rajoy berriz ere presidente eta PSOE makulu behar denerako...

Hara begira baino bertatik bertara bide berriak jorratu asmoz Zohardia ponentziari heldu eta Sortu gidatu asmo duen lan talde berria ezagutarazi berri dute. Bertan dira Arnaldo Otegi, Arkaitz Rodriguez, Miren Zabaleta eta Sonia Jacinto, besteak beste.

Hari berari tiraka, ‘Inurritegia’ prozesuari ekin dio Ernaik, apirilean amaituko den kongresu prozesua. «Garaipenaren belaunaldia gara» esanez ekin diote, erresistentziatik eraikuntzara jauzi egin eta honi loturiko epika propio bat eraikitzeko gaitasunaz sinetsita.

...eta harriak poltsiko zulatuetan besterik ez genituela uste genuen honetan, Joseba Sarrionandiaren berri izan dugu berriz. Habanan, Kuban, bertako unibertsitateak eta Etxepare Institutuak sinatutako lankidetza baten ondorioz Euskara eta Euskal Kultura irakurletza zuzenduko duela jakin baitugu.

Ez da zalantzarik berri onek ez dutela tragedia estaltzen. Ohean hil zen Franco diktadorea eta ohore, lausengu eta diru-zorroa barra-barra hilko dira haren oinordekoak ere... martxa honetan. Luhuson ‘Francoren bilobari gutuna’ antzezlanaren estreinaldian egoteko aukera izan nuen eta uste dut, Igor Elortzak eta Unai Iturriagak idatzi, Ximun Fuchesk zuzendu eta Artedramak, Le Petit Théâtre de Pain eta Dejabu Panpin Laborategiak taulara eraman duten lana ezin egokiagoa dela non gauden ulertzeko. Gogorra da atzera begirakoa, batzutan eman ez arren... eszena berean negar egin nuen atzeko planoari begira, lehen planoan gertatzen ari zenarekin ondokoak barrez ari zirelarik. Herriz herriko bira abiatu dute...

Asteon gainera urtea bete da Donostiako Kortxoenea eraitsi zutenetik. Bizia eta bizi-poza ziren lekuan hutsa eta ezereza uzteko... Oraindik garaiz zaudete naiz.eus/kortxoenean eraikin honen istorioa dakarren dokumentala ikusteko (igandera arte).

...eta asteon jakin dugu Ryanair-ek ez dakiela Gasteiz non dagoen, bertatik lanean hasiko bada ere berriz, eta bideo labur bidez azaldu digute aldaketa bizkorrik ezean gobernatuko gaituzten CETA eta TAFTA edo TTIP delakoa zer diren, Confebask haserretu arren behin-behineko kontratua zutenek ere jo dezaketela epaitegietara dagokien diru ordainaren bila, gure nerabezaroan zoratu gintuen Trainpotting-en 2. saioa ere badatorrela eta Iruñean «Black lives matter» idatzita kalera irten arren gehiegirentzat gutxiegi balio duela batzuen bizitzak...