Demokrazia eta askatasun agertoki baten alde indarrak biltzen jarraitzeko deia luzatu du Sortuk

Guardia Zibilak euskal presoekin lan egiten zuten hainbat abokaturen aurka burutu duen operazioaren harira, demokrazia eta askatasun agertoki baten alde indarrak biltzen jarraitzeko deia luzatu du Sortuk. Bide horretan, elkarretaratzeak deitu ditu herrietan biharko.

Sorturen Kontseilu Nazionaleko hainbat kidek agerraldia egin dute alderdiak Donostian duen egoitzan. Madrilen hastera zihoan epaiketa salatzeko prentsaurrekoa izan asmo zuena, ordea, Guardia Zibilak hainbat abokaturen aurka egin duen operazioa baloratzekoa bilakatu da.

Sortuk gogora ekarri duenez, operazio hau Estatu espainiarraren espetxe politikaren aurkako manifestazio jendetsua egin eta bi egunera iritsi da. «Hori ez da kasualitatea, erantzuna baizik», adierazi du Hasier Arraiz alderdiko lehendakariak.

Era berean, atxiloketak espetxe politika «kriminalaren» parte direla gaineratu du, «presoei sustengu guztia kentzeko». Horregatik, Euskal Herriak Guardia Zibilari «xake-matea» emateko unea dela adierazi du.

Bide horretan, euskal herritarrei dagozkien eskubide guztiak aldarrikatzen jarraituko duela azpimarratu du, «baina gure burua engainatu gabe. Gure herriarentzat –jarraitu du– bake, demokrazia eta askatasun agertoki posible bakarra espainiar Estatutik kanpo dago».

Agertoki hori errealitate bilakatzeko indarrak biltzen jarraitzeko deia egin du. Hala, gaurko operazioaren harira mobilizazioak deitu ditu Sortuk biharko herri guztietan.