Durangoko Azoka euskal musikaren topaleku bilakatuko da abenduaren 5etik 8ra bitartean, eta hortaz, antolatu diren dozenaka ekitaldi eta ekimenen artean ez da zuzeneko musikarik faltako. Lau egunetan zehar Plateruena antzokian zuzeneko emanaldiak ikusteko aukera izango da Ahotsenea kontzertu zikloaren barnean.

Guztira 36 musika proposamen entzuteko aukera izango da, goizetik arrats gauera bitartean. Emanaldi guztiak doakoak izango dira, eta sartzea libre izango da edukiera bete artean.

Ordu erdiko saioak

Talde edo musika egitasmo bakoitzak ordu erdiko saioa burutuko du Plateruenako taula gainean. Lagin bat izango da, taldea edo egitasmoa bizi-bizian eta gertu-gertutik ezagutzeko aukera polita. Ahotsenean joko duten guztiek disko berriak aurkeztuko dituzte, eta bide horretan plazaratuko diren lan guztiak 2024 honetan argitaratuak izan dira.

Gainera, guztiek abesteko orduan euskara dute oinarri nagusia, eta CD, binilo, kasete, USB edo formatu digitalean ikusi dute argia lanek. Emanaldi guztiak irudiz eta audioz grabatuak izango dira, eta Durangoko Azokaren youtube kanalean edo Hamaika telebistan ikus daitezke zuzen-zuzenean.

Anitza eta askotarikoa

Euskal Herriko musika eszenak aro polita bizi du sorkuntzari dagokionean. Urtero ehunka lan kaleratzen dira, eta horietako asko eta asko euskaraz abestuak dira. Izan ere, euskara musika era gehienetan entzun daiteke egun, ohikoak diren punk, rock, pop, metal eta folk doinuetatik, blues, soul edo elektronikatik datozen doinuetara.

Bide horretan Ahotsenea hori guztiaren erakusleiho izango da, eta bertan ariko diren proposamenak egungo eszenaren izebergaren punta erakutsiko dute. Beraz, aukera paregabea izan daiteke honakoa Plateruena antzokian zuzeneko musika entzun ondoren, azokan sartu eta stand artean musika berriaren bila aritzeko.


– AHOTSENEA – KONTZERTUAK – PLATERUENA ANTZOKIA

ABENDUAK 5 OSTEGUNA
10.30 – 13.15 Popperra, Afterra, Utopia.
15.40 – 16.10 Birkit
16.50 – 17.20 Eneritz Furyak
18.00 – 18.30 Postal kolekzionistak.
19.10 – 19.40 Aho zakil konexion.Amaiur
20.20 – 20.50 Ameba
21.30 – 22.00 Eider

ABENDUAK 6 OSTIRALA
11.00 – 11.30 Ainke
12.10 – 12.40 Mikel Artieda eta Leire Berasaluze
13.20 – 13.50 Maskak
14.30 – 15.00 Nize
15.40 – 16.10 Zinkha
16.50 – 17.20 Mirari
18.00 – 18.30 Albina Stardust
19.10 – 19.40 Kai Nakai
20.20 – 20.50 Hok Ttuk Amalau
21.30 – 22.00 Xsakara

ABENDUAK 7 LARUNBATA
11.00 – 11.30 Orhi
12.10 – 12.40 Karena
13.20 – 13.50 Ekhi Lambert & Haize Carricaburu
14.30 – 15.00 Kokein
15.40 – 16.10 Txopet
16.50 – 17.20 Neu Troia
18.00 – 18.30 Kaskezur
19.10 – 19.40 TOC
20.20 – 20.50 Ezpalak
21.30 – 22.00 Odei Barroso eta Benizze
22.30 – 23.00 Mugarik gabe

ABENDUAK 8 IGANDEA
11.00 – 11.30 Xabaltx
12.10 – 12.40 Saji
13.20 – 13.50 Kuartz
14.30 – 15.00 Xabier Badiola
15.40 – 16.10 TU-K
16.50 – 17.20 Keia
18.00 – 18.30 Ander Erzilla
19.10 – 19.40 Miriam Lujua