Chill Mafia taldeak Barakaldoko BECeko Cubec aretoan 2025ko martxoaren 28an emango duen agur kontzerturako harmailako sarrera gehiago jarri ditu salgai, astebetean pistako 5.000 agortu ondoren, antolakuntzako iturriek jakinarazi dutenez.

Segurtasun arrazoiak direla eta, aretoko ateak 20.30ean irekitzen direnetik Chill Mafiaren kontzertua 01.00etan amaitu arte balioko dute sarrera berriek, eta adingabeei ekitaldiaren zati horretara sartzeko aukera ere emango diete. Sarrera berrien prezioa 20 eurokoa izango da (gehi kudeaketa gastuak), eta 16 urtetik beherakoek heldu batekin joan beharko dute.

Iruñeko kuadrillaren agur festa handia jai giroan egingo da. Metrikak irekiko du, Jägermusic-en eskutik, eta azken kontzertuan gonbidatu ugari izango dira oholtzan, hala nola Nerve Agent, Hofe x 4:40, Euskoprincess, Bengo, La Txama, Mirua eta Arepas.

Kontzertuaren osteko festa DJ egitaraua zabalarekin egingo da 06.00ak arte, Katza, Puñales eta Bichos Raros-en eskutik, eta pistako sarrerek bakarrik balioko dute.

Edonola ere, agur festaren aurretik, Chill Mafiak kontzertuekin jarraitzen du, eta horrela, abenduaren 25ean Iruñeko Zentral aretoan izango da, sarrerak agortuta daudela. Urte berrian sartuta, urtarrilaren 3an eta 4an Bilboko Kafe Antzokian (bi egunetarako sarrerak agortuta), otsailaren 26an Madrilgo La Riviera aretoan, eta martxoaren 7an Bartzelonako Apolo aretoan izango da Iruñeko kuadrilla.