Belako eta Anari taldeek indarrak batu dituzte, eta kontzertu bira txiki bat burutuko dute datozen egun eta asteetan. Bost izango dira elkarrekin egingo dituzten emanaldiak, eta horietako lehena Iruñeko Zentral aretoan ospatuko da ostegun honetan, abenduak 5. Emanaldia 20.00etan hasiko da, eta sarrerak dagoeneko salgai daude aretoaren atari digitalean. 18 euroen truke eskuratu daitezke aretoaren atari digitalean.

Belaunaldiz eta musikalki parametro ezberdinetan diren arren, Anari banda eta Belako taldearen bideak ez daude hain urrun. Musika bizitzeko eta sentitzeko modu, energia eta intentsitateak handiak dira bi egitasmoetan, eta musika loturaz gain, ez da harritzekoa konplizitateak sortu izana bi egitasmoen artean.

Deus Ex Machina

Elkarlanaren lehen emaitza ‘Deus ex Machina’ izeneko kantua da. Belako taldeak osatu du kantuaren estruktura Anari Alberdiren letra batean oinarritua. ‘Fabula argitsu bat, garai ilun batentzat’ bezala definitu dute kantua. Abestia Bera (Nafarroa) herriko Atala estudioetan grabatua izan da Iñigo Irazoki soinu teknikariaren gidaritzapean. Bost minutuko kantu ederra da, non Cris Lizarragak eta Anari Alberdik abesten duten, Josu Ximun Billelabeitia (gitarra eta azpi-ahotsa), Lore Nekane Billelabeitia (baxua) eta Lander Zalakain (bateria) musikarien babesean.

Bira

Iruñako Zentral aretoan eskainiko duten emanaldia bira txikiaren lehen geltokia izango da, eta gerora Bilboko Kafe Antzokian arituko dira bi taldeak abenduaren 19an, ostegun gauez. Kontzertu honetarako sarrera guztiak aspaldi amaitu ziren, eta ez dira gehiago salduko egun berean.

Sarrerak amaitu dira Donostiako Intxaurrondo Kultur Etxean ere abenduaren 27a eskainiko duten emanaldirako. Urtea amaitzeko modu ederra izango da, lagunartean aretoa lepo beteta. 2025 urterako beste bi emanaldi hitzartu dituzte bi taldeek.

Urtarrilaren 4 gauean Gernikako Astran ariko dira, eta urtarrilaren 5erako hitzartu dute bira txiki honen azken emanaldia. Gasteizeko Jimmy Jazz aretoan izango da zita. Ohikoan bezala, sarrerak salgai daude aretoaren webgunean.