Larunbatean Elkartasun Jaialdiaren bigarren edizioa ospatuko da Lizarran. Egun osoko egitaraua prestatu da, non zuzeneko musikak garrantzia handia izango duen egun osoan zehar. Kontzertu gune nagusia Lizarra Ikastolako jolastokian kokatuko da, eta bertan, Sedientos de Cumbia, La Mala Pekora, Unidad Alavesa, Leizeak eta Raimundo El Canastero ariko dira zuzenean. Emanaldi honetarako sarrerak 12 euroen truke eskura daitezke entradium plataformaren atari digitalean, bai eta, Berri, Katxetas eta Ametsa tabernetan. Egun berean 15 euro ordaindu beharko dira ikastolako jolastokian. Egun osoko festa eta aldarrikapen eguna izango da.

Solasaldia, zirkua eta bazkaria

Goizeko 11.00etan hasiko dira ekimenak Sugarra gaztetxean antolatu den mahai inguru batekin. Bertan izango dira J Martina taldeko Kattalin Barcena, Julen Azkona idazlea eta Beñat Urria dantzaria, Raimundo el Canastero taldeko Ander Mazkiaran musikariaren gidaritza pean. Ondoren, Bizi-Bizi zirkuaz gozatzeko aukera izango da etxeko txikientzako Kiki eta Koko pailazoen eskutik, eta 13.30etan burutuko da bazkaria Lizarra ikastola bertan.

Kontzertu nagusiak

Arratsaldeko 16.00etan hasiko dira kontzertu nagusiak. Kartel koloretsu eta anitza prestatu dute, dantzara bideratuak diren moldaera ezberdineko erritmoak nagusi. Sedientos de Cumbia taldeak Karibeko erritmoak ekarriko ditu Lizarrara, eta musika festak La Mala Pekoraren napar-mex doinuekin jarraituko du. Unidad Alavesa taldearen eskutik rock folk zirikatzailea eta azidoa iritsiko da, eta Leizeak taldearen punk rock zuzena entzuteko aukera izango da, dena ez delako dantza koloretsua izango. Jaialdia amaitzeko Raimundo El Canastero taldearen emanaldiaz gozatzeko aukera izango da, non eta Fermin Muguruzaren parte hartzea iragarri duten zenbait kantuetan, elkartasuna eta musika berriz ere batuz agertokian.

Musika tabernetan

Gaualdia borobiltzeko kontzertuak eta disko jartzaileen saioak izango dira herrian zehar 00.00etatik aurrera. Bake Faltsua taldea La Bota elkartean ariko da zuzenean punk rock doinu oldarkorretan, eta disko berria besapean. Katxetas tabernan Dj Atenenas ariko da, eta Berri taberna, Dj Lis-J.