‘Kantu berri bat gara. Harri eta Herri’ ikuskizuna eskainiko du Jon Maiak Zumaian. Azken urteotan egindako ibilbidean Euskal Herriko makina bat txokotan bere proiektua aurkeztu ondoren bere jaioterrira iritsiko da hilaren 21ean. Gaueko 22.30ean da hitzordua. Sarrera doakoa izango da. 

Saio berezia izango da. Denera ehun pertsonatik gora izango dira ikuskizunaren partaideak. Maia eta lagunak kantinako terrazatik itsasoa aurrez aurre dutela arituko dira. Eta, behean, hondar gainean, entzuleak. Aulkiak jarriko dira bertaratzen direnentzat eskuragarri eta nork berea ere eraman dezake.

Izan, ere, ordu horretan hondarra bustia egongo da. «Marea biziak daude iragarrita, beraz hondatza handia egongo da, itsas behera goizaldeko 01.30ean da eta», adierazi du Maiak. Ikusgarria izango da, irudi eta argi proiekzio sistema berezi batek osatuko baitu musika emanaldia.

Ekitaldi hau Zumaiako Udalaren, Jon Maiaren eta herriko norbanako eta eragile askoren elkarlanetik sortu da. Hondartzan dantza egingo dute Lucia Lacarrak eta Matthew Golding dantzariek. Zumaiako Adar Joleak, Astindu Dantza Taldea, Eva Francoren Maskarada, Zaria Koru Eskolako Haur Abesbatza, Maddalen Arzallus bertsolaria, Samboy Diaby aktorea. Ezustekorik ere ez da faltako.

Jon Maia abeslaria, Lucia Lacarra dantzaria, Marina Bidasoro kultur zinegotzia, Miriam Romatet kultur teknikaria eta Esti Irureta turismo teknikaria egon dira asteazken honetan San Telmo ermitan egindako prentsaurrekoan.

Jon Maiak bere lan berriko abestiak joko ditu, eta horrekin batera herria, bertako kultura eta bere ingurune naturala omenduko ditu egitasmoak. «Zumaiaren identitateari helduko dio Itzurun hondartzan, Geoparkeko flysch-aren marko paregabea antzoki bihurtuta», esan dute Udaletik. ETB ere babesle du ikuskizunak.