Datorren otsailaren 15eko hitzordurako 40 Minutu Rock jaialdiaren kartela iragarri dute astelehen honetan.

Elkartasun jaialdiak Landako Gunean antolatuko duen musika eta aldarrikapen ekintzak, azken hilabeteetan beraien bideari amaiera eman dioten Euskal Herriko zenbait eragileren lana aitortu nahi du. «Aipamen berezia egingo diegu Hatortxu Rock eta Lasterbidean elkartasun jaialdiei. Lehenaren kasuan, Nafarroan errotuta, 25 urteko ibilbide oparoa egin du, eta euskal musika jaialdi handiek non begiratzeko erreferentzia bihurtu da urteen poderioz. Lasterbideanek, bere kasuan, Euskal Herriko 10 herri zapaldu ditu 10 urtetan, elkartasuna bazter guztietara zabaldurik, lasterketa bat baino gehiago bihurtu da», adierazi dute sustatzaileek.

«Bide batzuk amaitu dira, baina indarrak ez dira agortu. Horregatik, 40 Minutu Rockek edizio berrian bide berri bat irekitzeko abiada hartuko du. Bide horiek norabide bat dute: Askatasuna. Urte hauetan herriak, herriarentzat egin duen lanetik sortutako ‘bidetik, berriak sortu direla’ azpimarratu gura dugu», gaineratu dute. La Txama talde gipuzkoarrak aurtengo ediziorako egindako abestiaren esaldia da hauxe.

Sarrerak

Sarrerak jadanik eskuragarri daude online, BIBE atarian. Sarrerak 20 euro balio du aurrez erosita. Egunean bertan, 25 euroko prezioa izango du. 10.30ean hasiko da jaialdia.

Euskal Herriko puntu desberdinetan ere jarriko dira sarrerak, aurrerago argitaratuko direnak. Jaialdiak dei zabala egin dio euskal musikaz, musika aldarrikatzaileaz eta jai giro sano batez gozatu nahi duen herritar orori: «Herria bide berriei ekiten ari den garaiotan, elkarrekin ekitea inoiz baino garrantzitsuagoa izango da».

Hauek izango dira aurtengo Landakoko Gune Nagusian arituko diren artistak: Nakar, Anestesia, Süne, Tatta & Denso, TOC, Añube, La Txama, Pinpilipussies, Dupla, Kaleko Urdangak, Chulería Joder, Sukena eta Inquisición. Karpan, berriz, Pelma & Luis Selektorrak, Fito Skins, Maruxak, Ganibet, DJ Elepunto eta DJ Pezón.