Estutu eta Garratz taldeek disko berriak aurkeztuko dituzte urtarrilaren 4ko gauean Elorrioko gaztetxean. Moldaera ezberdinetako punk giroak nagusituko dira 22.30ean hasiko den gaualdian, non talde bakoitzak bere nortasuna erakutsiko duen agertoki gainean. Emanaldi honetarako sarrerak egunean bertan jarriko dira salgai sei euroen truke, kontzertua hasi baino ordu erdi lehenago.

Estutu

Elorrion bertan dute entsegu lokala Estutu taldeko kideek. Mario (bateria), Andoni (baxua), Andu (gitarra) eta Aimar (ahotsa) dira Estutu, eta 2018 urtetik dabiltza jardunean. Musikalki punk oi! eta punk rock doinuetan sakontzen dute, eta ederki erakusten dute hori orain artean argitaratu dituzten bi diskoetan. 2021. urtean ‘Errebeldia hasi da’ debuteko lana kaleratu zuen bandak, eta 2024an iritsi zen ‘Gure Hautua’, oraingoz, taldearen azken emaitza. Bigarren lan luzea Lorentzo Recordsen estudioetan grabatu dute, auto-ekoizpen gisa. Ostiral gauean etxean ariko da, herriko gaztetxean, eta diskoetan grabatu dutena jende aurrean taularatuko dute.

Garratz

Arrasate eta Elorrio artean sortu zen Garratz taldea 2022ko udazkenean, musika pasioz bizi duten bost lagunen artean. Musika eszenako zakur zaharrek osatzen dute banda, aspalditik punk rockaren errepidean ibilitakoak. Izan ere, punk rocka oinarri du taldeak bere doinuetan, baina musika kokteleran reggae giroak eta bestelako doinuak ere sartzen dituzte, taldearen erritmoak bestelako norabide batzuetan jarriz. 2023 urtean ‘Hau ez da irratian entzungo’ disko txikia plazaratu zuten, eta 2024an ‘Arnasak estu hartzeraino’ lanak ikusi zuen argia. Orain, ‘Gutako bat izan’ kantua kaleratuko du bandak, eta laster izango da entzungai plataforma digital guztietan. Diskoak disko, zuzenean eztanda egiten duen taldea da Garratz.