Urtea Atarrabiako Totem aretoan zabalduko du Soziedad Alkoholika taldeak, eta bide horretan urtarrilaren 4an ariko dira zuzenean. ‘Confrontacion’ disko berria kaleratu berri du banda arabarrak, eta lan berriarekin batera bira abiatu du. Pasaden asteburuan Gasteizko Jimmy Jazz aretoa bi egunez bete eta gero, ‘Sarrerak amaitu dira’ txartela zintzilikatu dute larunbateko emanaldirako; egunean bertan ezingo dira eskuratu aretoaren leihatilan. Gaualdia Flitter talde nafarrak zabalduko du.

Feliz Falsedad

80. hamarkadaren amaieran sortuak, tinko eutsi diote urte hauetan guztietan hardcore, thrash eta metalaren arteko abiadura eta intentsitateari. Diskografia oparoa batu du taldeak urte hauetan guztietan, eta eskaintzen dituzten emanaldietan dena ematen dute. Taldearen emaitza berrienak ‘Confrontacion’ izena darama eta bere musika ibilbideko hamabigarren lana da. Disko berrian kantu indartsuak barneratu dituzte, oraindik orain, taldea egurra banatzeko egoera onean dela aldarrikatuz. Berriki gainera bateria-jotzailea aldatu dute; Mikel Gomez ariko da hemendik aurrera danborrak astintzen taldean. Lampr3a eta Childrain taldeetako kidea ere bada. Disko berriko kantuekin batera ez dira faltako taldearen klasikoak, eta ‘Polvo en los ojos’, ‘Tiempos oscuros’, ‘Palomas y Buitres’, ‘Ratas’, edota ‘Nos Vimos en Berlin’ bezalako kantu ezagunak entzuteko aukera ere izango da. Gainera, ‘Feliz Falsedad’ kantua joko du bandak, urteak atzera gabon egun hauetarako espreski egin zutena.

Flitter

Emanaldia Flitter taldeak zabalduko du. 90. hamarkadan rock eta metal doinuekin Euskal Herriko musika eszena eztandarazi eta gero, Lizarrako taldea agertokietan da azken urte hauetan guztietan. Diskografia oparoa batu zuten urteak atzera, eta aro berrian ere diskoak eta zuzenekoak tartekatu dituzte normaltasunez. Erreferenteak izan ziren bere gaian, eta egun ere bolumen handian zarata ateratzeko prest dira agertoki gainean.