Adingabeek egunean lau ordu inguru igarotzen dituzte pantailen aurrean, ikasgeletan pasatzen dituztenez gain. Tarte horretan, Tik Tok bezalako sare sozialak erabiltzen dituzte, batez ere, WhatsApp bezalako komunikazio-aplikazioak baino gehiago.

Datuak ‘Alphatik Zetara; belaunaldi digitalak hezten’ ikerketan azaleratu dituzte. Familientzako segurtasun eta kontrol digitalean espezializatua dagoen Qustodio plataformak egin du ikerketa, munduan lau milioi erabiltzaile baino gehiago dituena, eta urtero erradiografiatzen du adingabeek sareak nola erabiltzen dituzten: pantailen aurrean igarotzen dituzten orduak, gehien erabiltzen dituzten aplikazio eta sareak edo hiperkonektibitateak ekar ditzakeen ondorioak aztertzen dituzte, besteak beste.

Espainiar Estatuan, Estatu Batuetan, Erresuma Batuan eta Australian 4 eta 18 urte bitarteko adingabeek pantailen inguruan duten jokaera eta erabilera aztertzen ditu ikerketak, eta 400.000 familiak hartu dute parte bertan, Qustodiok emandako datuen arabera.

Eduardo Cruz plataformaren arduradunak azpimarratu du oso garrantzitsua dela «dieta digitala» egitea, Interneten eta pantailen abantailak aprobetxatzeko eta aldi berean arriskuak eta mehatxuak saihesteko.

Adingabeek pantailak arduraz eta neurriz kanpo erabiltzeko gomendio eta aholku nagusien artean, honakoak aipatu ditu: «Ordutegi teknologikoa» ezartzea, ingurune digitalei buruz hitz egitea, adingabeek ez ditzatela pantailak haien geletan itxita erabili, eduki digitalak familian partekatzea, mundu fisikoan edo «errealean» alternatiba erakargarriak eskaintzea eta adin nagusikoak eredu izatea.

Hiperkonektibitatea edo etengabeko konexioa arazo larria bihurtzen ari da kasu askotan, eta mendekotasun-arazoak sortzen dizkiete adingabe askori

Eduardo Cruzek azpimarratu du konektagarritasunik gabeko ordutegiak ezartzea interesgarria izan daitekeela, eta pantailek ez dizkietela denborarik edo lekurik kendu behar beste jarduera batzuei, hala nola, loa, ikasketak edo aisialdiko jarduerak. Halaber, ohartarazi du hiperkonektibitatea edo etengabeko konexioa arazo larria bihurtzen ari dela kasu askotan, eta mendekotasun-arazoak sortzen dizkietela adingabe askori, mundu «fisikoa» edo erreala «traba» bezala sumatuz beren bizitzetan.

Datu deigarrienen artean, nabarmentzekoa da ikerketan parte hartu duten familien %15,6k onartzen duela pantailen gehiegizko erabilerak arazoak sortzen dituela egunero etxean, eta gatazka horiek astean behin edo bitan errepikatzen direla familien %34an.

Sare sozialak izan ziren, berriz ere, 2022an adingabeak gehien erakarri zituena. Adierazle hori errepikatu egiten da azterketa egin den lau herrialdeetan, eta Espainiar Estatuan datuek erakusten dute ia ordubete pasatzen dutela sare horietan egunero, batez ere Tik Tok sarean, adingabeen artean nabarmen gainditzen baititu Instagram bezalako sareak (30 eta 40 urtetik gorakoek gero eta gehiago erabiltzen dute), eta baita Snapchap, Facebook edo Twitter ere.

Espainiar Estatuan, hala ere, zenbait komunikazio aplikazioen erabilerak behera egin du iaz, WhatsApp kasu

Aitzitik, Espainiar estatuan mezularitza eta komunikazio aplikazioen erabilerak, WhatsAppena kasu, behera egin zuen iaz, eta adingabeek horrelakoetan igarotzen duten denbora 2021ean batez beste 30 minutukoa izatetik iaz 24 minutukoa izatera igaro da.

Bideojokoen artean, ezagunena Roblox da lau herrialdeetan, eta adingabeek egunero bi ordu baino gehiago ematen dituzte joko horretan, ikerketan jasotako datuen arabera.

Pandemiaren ondoren, Interneteko hezkuntza tresnen erabilerak behera egiten jarraitu du, eta Smartick plataformak soilik jarraitu du adingabeen artean erabilera denbora handitzen, eta batez beste 29 minutukoa izan da egunean.

Sareko bideo-plataformen artean igoera handia izan du Prime Videok adingabeen artean, nahiz eta oraindik ere Netflix eta YouTuberen atzetik dagoen, lau herrialdeetan bideoak ikusteko adingabeen artean gustukoena izaten jarraitzen baitu YouTubek. Twitchek, berriz, 2020an %150 egin zuen gora, eta iaz jaitsiera txiki bat izan zuen berriro.