Uztailaren 6tik 8ra Bilboko Kobetamendin ospatu zen BBK Live jaialdiaren 17. edizioak marka guztiak hautsi dituela dirudi, antolatzaileek ostegunean plazaratu dituzten datuen arabera. Last Tour enpresa sustatzaileak eta Bilboko Udalak berak emandako datuen arabera, hiru eguneko musika-hitzorduak inoiz bildu duen jende kopururik handiena bildu du, 120.000 lagun baino gehiago.

Bildu den publikoari dagokionez, Kobetamendin guztira 116.000 pertsona bildu dira, 75 herrialdetatik baino gehiagotik etorriak, eta gainditu egin da azken edizioko errekorra. Zehazki, ostegunean, lehen egunean, 37.800 pertsona bildu ziren; ostiralean, 38.200; eta larunbatean, azken egunean, 40.000 pertsona.

Zifra horiei, Bilbao BBK Live Bereziak izeneko ziklo paraleloaren barruan hirian bertan izan diren kontzertuetako publikoa gehitu behar zaie, 4.000 pertsona inguru. Guztira, 120.000 pertsona baino gehiago.

Jatorria: %41a, Estatukoa; %35a nazioartekoa eta %24 etxekoa

Jatorrien arabera, %35 beste herrialde batzuetatik dator, eta datu horrek finkatu egiten du jaialdi honen nazioarteko izaera. Atzerritik etorritako publikoaren barruan, Erresuma Batua (%34), Estatu frantsesa (%26), Italia (%14), Alemania (%7), Bretainia Handia (%6) eta Herbehereak (%5) aipatu behar dira, publikorik gehien herrialde horietatik etorri baita. Beste %24 etxeko publikoa izan da, bilbotarrak, eta Euskal Herriko beste txoko batzuetatik etorriak.

Estatutik, guztira %41. Eta autonomia-erkidegoen artean, jaialdi honen zaleturik gehien dutenak Madril, Catalunya, Valentziako Erkidegoa, Kantabria eta Andaluzia dira.

Adin mota: zabala

Adin tartea ere zabalagoa izan da, eta horrek berretsi du jaialdia adin guztietako publikoarentzat dela: %12, 18 eta 24 urte bitartekoak; %46, 25 eta 34 urte bitartekoak; %24, 34 eta 44 urte bitartekoak; %10, 45 eta 54 urte bitartekoak; eta %7, 55 eta 64 urte bitartekoak.

Bilbao BBK Live da ekitaldirik garrantzitsuenetakoa hirian udako sasoian gauzatzen direnen artean, eta heldu den edizioa datorren urtean izango du, uztailaren 11n, 12an eta 13an.

Udako musika-jarduera osatzeko uztail hondar honetan, uztailaren 28an, 29an eta 30ean, guztiz doan, Areatzan, Bilbao Blues Festival ospatuko da, Udalak berak sustatzen duen ziklo bat, Aste Nagusiaren atariko moduan. Aldez aurretik, baina, eta bestelako formatu batekin, ekainaren 23an eta 24an, Bilboko Areatzako instalazioetan, BBK Bilbao Music Legends Fest egin zen.

Datu ekonomikoak

Eragin ekonomikoari dagokionez, ostalaritzari eta merkataritzari eta ostatalekuei eragin die, batez ere. Ostatalekuei dagokienez, % 95eko okupazioa gainditu da hoteletan, jaialdiak iraun duen artean.

Beste datu batzuen artean, antolakuntzan 3.000 profesional baino gehiago enplegatu direla, tokiko enpresa batzuetakoak eta besteetakoak, direla logistikaren arlokoak, horniduretakoak, zerbitzuetakoak, argiztapenekoak, soinukoak, ikus-entzunezkoen arlokoak, segurtasunekoak edo cateringekoak, eta, hala, azpimarratu dutenez, 0 kilometroko kontratazio-politika bat baliatu da, Bilboko eta Bizkaiko hornitzaileak lehenetsiz.