70. hamarkadatik gaur egunera arteko artistei eta abeslariei garrantzia ematea helburu duen Ura Bere Bidean proiektuan parte hartu dute Gatibu taldeko Alex Sardui abeslariak eta Haimar Arejita gitarra-jotzaileak, ‘Gabak zerueri begire’ abestiaren bertsio batekin.

Ostegun honetan kaleratutako bideoan Sardui eta Arejitari Fernando Velazquezek zuzendutako orkestra batek laguntzen die. Alex Sarduiren ustez, Velazquez «maisu bat da moldaketak egiten» eta jatorrizko abestiaren melodiaren «freskura eta dinamika» mantentzen ditu, moldaketa «elegante» batean.

Haimar Arejita bere kidearekin ados dago eta orkestra zuzendaria «zoriondu» egin behar dela uste du, batez ere harien sekzioan moldaketak «oso ondo eta oso moderno» eginda daudelako.

Gatibuko kideentzat abesti hau «inflexio puntu bat» izan zen. Fernando Velazquezek dioenez, «uda iritsi dela dioen mezua helarazten du» eta «abestiak deskribatzen duen guztia heltzen ikusten ari gara orain».

«Batek uste du Gatiburen musikak ez duela orkestra batekin funtzionatuko, baina bat-batean badirudi jatorrizko bertsioa orkestrarena dela», adierazi du Velazquezek, taldearen berezko lana nabarmentzen duen arren.

Ura Bere Bidean proiektuak «gure musika beste era batean eskaintzea» ahalbidetzen dio Gernikako taldeari eta datorren urriaren 28an Barakaldoko BECen beste artista batzuekin, Bilboko Orkestra Sinfonikoarekin eta Bilboko Koral Elkartearekin eskainiko duten emanaldira bertaratzera dei egin dute.

Proiektua aurrera doa eta hemendik aurrera abesti baten bertsio bat kaleratuko dute astero. Besteak beste, Sorotan Bele, Bulego, Süne, Skakeitan, Esne Beltza, ETS, Mikel Urgangarin, Gozategi, Zea Mays eta Rozalen musikariek parte hartu dute egitasmoan.