Donostiako Eureka! Zientzia Museoa maila goreneko zientzialarien eta ikasleen arteko topagunea izan da ostegun honetan, Donostia International Physics Centerrek prestatuta, 14. urtez. Jean-Pierre Sauvage Kimikako Nobel sariduna, Mairi Sakellariadou Europako Fisika Elkarteko lehendakaria eta Pilar Hernandez CERNeko Zientzia Politika Batzordeko lehendakariordea izan dira Bigarren Hezkuntzako eta Batxilergoko gaztetxoekin mintzatzen.

Araba, Bizkai eta Gipuzkoako 41 ikastetxetako 242 ikaslek eta irakaslek hartu dute parte ekitaldian. Ikasleek hitza hartu dute eta, ordu eta erdiz, gonbidatutako zientzialariei galderak egiteko aukera izan dute.

Sauvagek «berrikuntza beste edozein kontsiderazioren gainetik jartzea» gomendatu die abiarazi nahi dituzten proiektuak aukeratzeko orduan. Sakellariadouk, berriz, zera azpimarratu du: «Hezkuntza zientifiko goiztiarrak begiak irekitzen dizkio adimenari, jakin-mina pizten du eta iluntasunaren aurka borrokatzen laguntzen du».

Pilar Hernandezek esan duenez, «egia interpretagarria dela dirudien mundu batean, zientziak erakusten digu badirela inguratzen gaituen munduari buruzko ziurtasunak, hori ulertzeko aukera ematen digutenak, eta, kasu askotan, ezagutza hori pertsonen bizitza hobetzeko erabiltzeko aukera ematen digutenak».

«Zientziak aurrera egiten du zuek bezalako gazte batzuek mundua ulertzeko jakin-mina dutelako eta funtsezko galderak egiten dituztelako», erantsi du.

«Hazi eraldatzaile bat»

Pedro Migel Etxenike, Asturiasko Printzea sariduna, UPV/EHUko katedradun emeritua eta Donostia International Physics Centerreko (DIPC) lehendakaria, aritu da moderatzaile lanetan. Honakoa adierazi die ikasle eta irakasleei amaieran: «Zientzia gizartearen hazi eraldatzaile bat da. Zientzia beharrezkoa da ongizate sozial eta ekonomiko handiagoko gizarte baterantz aurrera egiteko, pentsamendu kritiko handiagoarekin eta manipulatzeko gaitasun txikiagoarekin gizarte gizatiarrago baterantz».

«Zientziari eta aurrerapenari laguntzeko borondatearekin eta ahaleginarekin lan egitera animatzen zaituztet», esan die.

Galderarik interesgarriena

Galderarik interesgarriena, originalena edo bitxiena egin duen ikaslea Libe Bercedo Barriola Aldapeta ikastetxeko ikaslea izan da. Honako galdera luzatu du: «Soken teoriaren eta sortzen ari den grabitazio kuantikoaren arteko lotura gero eta handiagoa dela eta, zein neurritan mugatu dezakete gure tresna zientifikoek eta gizakiaren interpretazio-gaitasunek fenomeno horiek ulertzeko dugun gaitasuna?».

Galdera hori saritu du Telefonicak, DIPCko patronatuko kideak, «zientziarentzat garrantzi handia duen gai esanguratsu bati ekiteagatik: ikerketa zientifikoan behaketarekin batera agertzen diren mugak, instrumentalak zein intelektualak».

Gazteen artean ikasketa zientifikoekiko eta teknologikoekiko bokazioa sustatzea du xede nagusi ‘top@DIPC - Zientziarekin solasean!’ izena duen topaketa honek, eta baita ikasle gazteei ezagutzarekiko grina piztea ere.