Italiako Turismo Ministerioak atzerriko turistak erakartzeko sustapen-kanpaina bat abiarazi zuen, 9 milioi euroko aurrekontuarekin. Bideo batean, lagun talde bat topa egiten erakisten du leku zoragarri batean, baina Eslovenian kokatutakoa, Italiako zenbait hedabidek salatu dutenez.

‘Il Fatto Quotidiano’ egunkariko kazetari Selvaggia Lucarellik jakin zuen Italiako edertasunak erakutsi behar zituzten irudiak benetan Esloveniako upeltegi bat zirela eta Esloveniako bertako ardoarekin egiten zuela topa.

‘Corriere della Sera’ egunkariak Terroir films ekoiztetxeko Massimiliano Milicen adierazpenak ere jasotzen ditu. Facebooken salatu zuen eszenak berreskuratu daitezkeela atzerriko Artgrid plataforman, eta zerbitzuko harpidetzak 600 euro balio duela.

‘Open to meraviglia’

Beste hedabide batzuek ere kritikatu dute ‘Open to meraviglia’ izeneko kanpaina, Botticelliren Venusa influencer gisa erabiltzeagatik herrialdea sustatzeko, kalitate gutxiko eta leku komunetako muntaia batzuen bidez.

Daniela Santanchè Turismo ministroak Botticelliko Venusaren aukeraketa defendatu zuen irrati elkarrizketa batean, eta 9 milioiak kanpaina mundu osoko aireportu eta tren geltokietara eramateko direla azaldu zuen.

Leku komunei buruz honakoa erantzun zuen: «Ez ditut kritikak ulertzen, pizza ospetsua da mundu osoan, dieta mediterraneoaren eta gure sukaldaritzaren parte da, mundu osoan estimatua, imitatua eta kopiatua dena. Beharbada, kabiarra eta izokina jaten duten snob samarrek kritikatuko dute, baina italiar gehienek eta mundu osotik datozen turista askok estimatzen dute».