Proiektua 2013an hasi zen Itsasmuseumek lehiaketa artistiko bat bultzatu zuenean EHUrekin eta Aurtenetxea Containersekin lankidetzan. Horren bitartez, itsas edukiontziak, salgaien garraioan ohikoak diren elementuak, hiri-artelan bihurtzeko gonbidapena luzatu zitzaien Arte Ederren Fakultateko ikasleei, esparru publikoan sormena eta esperimentazio artistikoa sustatzeko helburuarekin.

10 edizio egin dira egitasmoa martxan jarri zenetik; 2020an bakarrik eten zen, pandemiaren ondorioz. Guztira, 10 proiektu saritu dira eta denak zabalgunean egon dira ikusgai. Edizio guztiek harrera ona izan dute eta proiektu ugari jaso dira urtero. Hamar edizioetako lan irabazleen ibilbidea jaso da ‘10 urtez artea edukiontzietan’ erakusketan.

Artistak, gogoan

Museo-diskurtsoko zeharkako gaiak jorratu dituzte proiektu irabazleetako gehienek: itsasoarekin, jasangarritasunarekin, industriarekin edo Bilbo edo Bizkaiko itsas historiarekin lotutakoak. Oso anitzak izan dira aurkeztutako proiektuak; batzuk, esperientzia artistiko garaikidera bideratuak, eta beste batzuk, berriz, kontzeptualagoak.

Orain, ‘10 urtez artea edukiontzietan’ erakusketak etapa bat itxi nahi du eta ekimen honen bidez museoarekin lankidetzan aritu diren artista guztiak gogoratu nahi ditu, lehiaketan sarituak izan diren obra guztiak bilduz.