Pushkarreko lakuaren ertzak jendetza hartzen hasten dira azoka hasi aurretik. Izan ere, basamortuko nomadentzat eta urrutiko komunitateetan ehunka kilometrora bizi diren gamelu hazle askorentzat azoka hau da urteko aukera bakarra beren bizimoduari eusteko behar adina diru-sarrera lortzeko. Gehienek aintziraren inguruan kanpatzen dute familiekin batera. Beste batzuek, berriz, basamortuko dunak okupatzen dituzte.

Jakina, zaldi eta dromedario ugari daude nonahi, asko eta asko egun horietarako propio apainduta oihal deigarri, bitxi distiratsu, urre koloreko besoko eta artilezko bolazko lepoko handiekin. Alabaina, ez dira animalia bakarrak, mota guztietako abereak baitaude han-hemenka jende artean sakabanatuta: behiak, ardiak, ahuntzak... Azoka ezagutzen dutenak arazorik gabe moldatzen dira, ohituta daudelako, baina lehen aldiz joaten denak ikasi beharko du ustekabeko “sorpresak” garaiz eta egoki saihesten.

Koloreak, espezieen usain intentsoa, etengabeko zarata, kea, beroa... Pushkar irakiten egoten da egun horietan. Sortzen den zalaparta jasanezina da batzuetan. Eta asko lakuko ur sakratuetan bainatzen dira, kondaira batez inguraturik dagoen lakuan: Pushkar jaio zen Brahma jainko sortzaileak bere loto-lorea (pushpa) Thar basamortuko lur idorretara bota zuenean; horren petalo handienetik ur urdineko aintzira handi bat sortu zen eta, ondoren, bertan jainko hindu guztiak elkartu ziren. Hori dela-eta, merkatari, turista eta basamortutik etorritakoei egun hauetan ehunka erromes hinduista batzen zaizkie, garbiketa-erritua betetzera Pushkarrera propio hurbiltzen direnak.

Jakina, negozioetan aritzen direnak, salgaien salerosketan ibiltzen direnak, gizonezkoak dira; emakumezkoak, berriz, kozinatzen aritzen dira edo azokako postuak bisitatzen. Denetarik dago: dir-dir egiten duten bitxiak, brodatuak, mota eta kolore askotako ehunak, garestiak zein merkeak... Ganadu enkanteetan antzinako kantuak entzuten dira. Batez ere, Gujarat, Rajastan eta Madhya Pradesh estatuetatik etorritakoek erosten dituzte gameluak, etxaldeetan edo garraio gisa erabiltzeko.

Festa, berez, gamelu-lasterketa tradizionalarekin abiatzen da. Bisitariek gehien espero duten uneetakoa bada ere, azokak irauten duen egunetan zehar lehiaketa bitxi samarrak egiten dira, gero eta gehiago, gainera; adibidez, matka phod bibote luzeenaren norgehiagoka).