Iker Irribarriak eta Jon Jaunarenak –David Merinoren ordez arituko dena– irabazi beharra daukate gaur gauean Bergarako Udal Pilotalekuan, Binakako Txapelketan bizirik jarraitu nahi badute. Lau garaipenekin daude sailkapenean eta gaur galduz gero, ia mirari bat beharko lukete finalerdietan sartzeko.

Ez dituzte, ordea, aurkari samurrak aurkituko; hain zuzen ere, sailkapeneko lehen postuan dauden Elezkano II.a eta Rezusta. Gainera, gaizki pentsatzen hasita, norbaitek esan lezake enpresa bereko pilotariak direla eta liderrek, jada sailkapena poltsikoan edukita, erlaxazio puntu bat izan lezaketela. Baina zalantzak uxatzeko: argi dago Beñat Rezustak bere herrian jokatuta ahalik eta maila onena eman nahiko duela.

Partidaren gakoa atzean egongo da, gainera. Rezusta egungo atzelari onena dela esan daiteke, eta Jon Jaunarenak ez du lan erraza izango hari eusten. Leitzarrak urtebete pasatxo darama atzelari moduan jokatzen, eta maila polita eman duen arren, ez du sekula exijentzia maila honetako demarik jokatu.

Horregatik, Iker Irribarriak asko lagundu beharko dio defentsan eta asko arriskatu erasoan. Lan zailak dira horiek, baina partida eder askoak jokatu ditu Aramakoak aurtengo txapelketan eta gaur beste urrats bat egiten saiatuko da.

Urriza-Ion, Galarretan

Galarretako partida nagusian Urrizak eta Ionek 33-40 menderatu zituzten atzo Ezkurra eta Barrenetxea IV.a.