ELEZKANO-REZUSTA 15

IRRIBARRIA-ZABALETA 22

 

Gutxi dira, batere ez esatearren, Binakako finalerako bidea Irribarria eta Zabaletak bezain garbi duten bikoteak. Duten ahalmenarekin, Aramakoak eta Etxarrengoak badakite kantxan agintzeko gai diren egunean inork gutxik egin diezaiekeela aurre, eta parean izan ditzaketen aurkaririk zailenetakoen aurrean, aginte makila eskuetan hartuta ekin zioten txapelketari Bergaran. Iazko txapeldunordeak, Elezkano eta Rezusta, partida osoan defentsa lanetan aritzera behartu zituzten urdinek eta, partida erdira arte-edo, hamahirunakoa izan zen azken berdinketa. Eustea lortu zuten arren, azken txanpan bandera zuria astindu zuten, aurkarien nagusitasuna onartuz.

Azken hilabeteetan bere inguruan zenbait zalantza eta zurrumurru egon badira ere, Iker Irribarriak lanean jarraitu duela erakutsi zuen Binakakoaren lehen jardunaldi honetan. Kolpez oso fresko, sotamanoz eta boleaz zulo handiak irekiz, errematean ausart eta eraginkor eta defentsan ere txukun arituz, Aramakoa izan zen partidan distira bereziarekin aritu zen pilotaria eta bere aurpegirik lehiakorrena erakutsi zuen, Zabaleta sendo batek ondo lagunduta.

Deskuiduen arriskua

Argi dago, Aspeko bi pilotari hauek pilotari duten guztiarekin ematen diotenean, are gehiago Bergarakoa bezalako pilotaleku bizi batean, oso gutxi direla aurre egin diezaieketen bikoteak eta izan ditzaketen deskuiduek dirudite, gaur-gaurkoz, euren etsairik handienak.

Halakoxe zerbait gertatu zitzaien atzo Bergarako Udal pilotalekuan eta, partida haustea kostatu bazitzaien, hein handi batean, eurek pilatutako hutsengatik izan zen. 4-1 aurreratu ziren Elezkano-Rezusta, baina horretarako ez zuten jokoan tantorik egin beharrik izan. Ohikoa duen eran, Zabaletak partida hasiera hotza izan zuen; hasteko, sake bat eramateke utzi zuen eta beste bi pilota ere jarri zituen frontoiko eremuetatik kanpo. Hori gutxi balitz, Irribarriak ere falta egin zuen aurtengo txapelketan egindako lehen sakean.

Baina behin jokoan sartutakoan, Irribarriak izugarrizko abiadura eman zion pilotari eta aurreko astelehenean Ezkurdiarekin esaten genuen bezala, ia ezinezkoa da pilotari halako abiadura ematen dion pilotariari aurre egitea gaur egun. Zabaletak ere lagundu zuen lan horretan eta Rezustari pilota azkarregi etortzen zitzaion gauza onerako.

Danel Elezkanok apenas izan zuen erasora pasatzeko aukerarik baina, hala ere, Zabaletaren beste txakalaldi bat lagun, partida hamahiruna berdintzea lortu zuten. Dinamika, ordea, ez zen aldatu eta urdinek agintzen jarraitu zuten amaierara arte.

 

Mariezkurrenaren debuta Tolosan

Binakakoaren lehen jardunaldia Tolosan amaituko da gaur arratsaldean, Bengoetxea VI.a-Imaz eta Artola-Mariezkurrena II.ak jokatuko duten partidarekin. Begirada gehienak Berriozarreko atzelariarengan jarriak izango dira, lau hilabete baino ez baititu eman profesionaletan eta dagoeneko lehen mailan aritzeko aukera eman baitio Asegarce bere enpresak.

Epe labur honetan, etorkizun handiko pilotaria dela erakutsi du nafarrak, baina ikusteko dago gorengo mailan nola erantzuten duen, horren txapelketa zorrotzean. Alboan Iñaki Artola izango du, udan enpresako pilotaririk onena binaka, baina Lau eta Erdikoan zaplazteko handi samarra eraman zuena; gainera, aurreko astean sabeleko arazoekin ibili da alegiarra.

Oinatz Bengoetxeak eta Ander Imazek ez dute beste bikote batzuen izen edo jorik, baina eurena ematen duten bi pilotari dira eta ezer oparitzen ez dutenak. J.O.