Taldeka jokatzeak ematen dion berezitasun horretatik harago, Bizkaia Torneoak ezer onik badu, hori, normalean udako torneoetan aukerarik izaten ez duten pilotariei, batez ere aurrelariei –Urretabizkaia izango da buruz buru arituko den atzelari bakarra– momentuko izarrekin lehiatzeko aukera ematen diela izango da. Foru Aldundiaren babesarekin antolatzen den torneo honek zortzigarren ekitaldia du aurten, eta badirudi bere egitura egonkortzen ari dela eta, azken aldietan bezala, hiru distantziatan jokatuko da: kaiolan, binaka eta buruz buru.

Denera, 24 pilotari, enpresako hamabina, arituko dira lehiaketa honetan eta bikoteak enpresa erabakiz jarri badira ere, banakako partidetan talde bakoitzak izango dituen pilotariak atzoko aurkezpenean egindako zozketan erabaki ziren. Ohi bezala, talde bakoitzak Bizkaiko mendi baten izena eramango du, eta honela geratu dira: Ganekogortaren izenean, Ezkurdia-Martija arituko dira binaka, Peio Etxeberria lau eta erdian eta Zabala buruz buru; Oizen babesean arituko dira Elezkano II-Zabaleta, Jaka kaiolan eta Elordi kantxa osoan; Gorbeiarekin, Altuna III-Rezusta, Retegi bi eta Dario; Artola-Albisu dira Solluberen kapitainak eta Bakaikoak eta Urretabizkaiak osatuko dute taldea; Anbotorekin arituko dira Olaizola II-Aretxabaleta, Laso eta Arteaga, eta amaitzeko, Urrutikoetxea-Mariezkurrena II.ak, Victorrek eta Agirrek ordezkatuko dute Kolitza mendia.

Lehiaketa sistemari dagokionez, bost jaialdi izango dira, enpresako bina, eta abuztuaren 20an Bilboko Bizkaia pilotalekuan jokatuko den finala. Final-laurdenetako bi kanporaketak uztailaren 21ean jokatuko dira, Aspekoa Barakaldon Gorbeia eta Ganekogortaren artean eta Baikokoa Etxebarrin, Sollube eta Kolitzaren artean. Kanporaketa hauen irabazleen zain izango dira Oiz –Ermuan uztailaren 25ean– eta Anboto –Zierbenan hiru egun beranduago–.

Gauzak horrela, Aspek denboratxo bat eman nahi izan dio Danel Elezkanori pubisean duen lesiotik osatzeko. Zaratamokoa «aspertu xamar» omen dago, medikuek atseden hartzeko eskatu baitiote, agindutako ariketak egiten. Uztailaren 7an Iruñean jarritako partida ez du jokatzerik izango, eta bere asmoa hilaren 14an jarri dioten partidan aritzea da.

Pala Donostian

Uda txapelketa sasoia izaten da, eta Donostian ere izan zen aurkezpenik, kasu honetan palakoa, bertako Udalak eta Innpala enpresak Master Kirol Txartela lehiaketa antolatu baitute. Hiru mailatan jokatuko da, gazteetan, emakumezkoetan eta senior gizonezkoetan. Asteazken honetan hasi eta hurrengo zortzi asteetan pala partidak egongo dira, beraz, Atano III.ean.

Gizonezko seniorretan Innpalako zortzi profesional eta Realeko eta inguruko afizionatuak arituko dira. A taldean, Garate-Andonegi, Ibarguren II-Urrutia eta Mihet-Ibargarai eta Landeta-Gordon; B multzoan, Altuna-Perez, Necol-Benoit, Ibarguren-Vigeon eta Gaubeka-Rekalde.