Binakako Txapelketaren lehen zatia azken fasean sartu den honetan, badira huts egiteko aukera guzti-guztiak agortuak dituzten bikoteak. Aurreko ostiralean Tafallan horren beharrezkoa zuten bigarren puntua eskuratu bazuten ere, asteburuko gainontzeko emaitzek ez zieten askorik lagundu eta Jaka-Martijak beste match ball bat izango dute astelehenean Etxebarrin, aurkari zuzenak dituzten Mikel Urrutikoetxearen eta Ander Imazen aurka. Eskua pixka bat uzkurtu daitekeen partidak izan daitezke hurrengoak, baina buruz buruko txapeldunak argi dauka partidaren garrantzia handia izanagatik, ezin dutela nortasunik galdu. «Julenek Julen izan behar du eta nik ni».

«Aurrera egiteko aukeraren bat izan nahi badugu bai edo bai irabazi beharra daukagu», azaldu zuen, aho bizarrik gabe, Julen Martijak atzo arazorik gabe joan zen material aukeraketan. Horrek, ordea, ezin ditu kontserbadoreago aritzera, hutsak egiteko beldurrez jokatzera eraman Erik Jaka bere aurrelariaren arabera. «Hemen garrantzitsua da asko egitea gutxi galduta. Egia da asko egiteko eguna ez daukazunean garrantzia hartzen duela gutxi galtze horrek, baina argi daukadana da nire estiloari leial izango naizela: aukera dudanean aprobetxatzen saiatuko naiz eta ez naiz espekulatzen hasiko hiru edo lau tanto ez galtzearren», azaldu zuen.

Garrantzitsua bi bikoteentzat

Partida oso garrantzitsua izango da bi bikoteentzat, Urrutikoetxea-Imazek irabaziko balute hiru puntura utziko bailituzkete Aspekoak. Are, elkarren aurkako bi partidak irabazita izango lituzkete eta ezingo lituzkete sailkapenean harrapatu.

Kontuak kontu, misterio handirik gabeko partida espero du lizartzarrak astelehenerako. «Azkenaldian partida gehienak antzera joan dira. Atzelarien artean agintzen duenak, gutxien galtzen duenak edo bere jokoa hobeto egiten duenak, aurrelariari aukera gehiago sortzen dizkio eta normalean partidak hortik joaten dira. Aurreko astean Julenek kristoren partida egin zuen eta entrenatzen ere oso ondo ikusi dut. Ea jarraipena emateko gai garen».

Baikokoek Muskizeko jipoitik errekuperatzen jarraitzen dute. Imaz sekula halako partida luzerik jokatu gabea omen zen, baina, noski, puntuarekin dena da errazagoa eta kantxan gero eta hobeto sentitzen ari dira.