Irakasle elkartuak (unibertsitatetik kanpo nahitaez jarduera nagusi bat garatzen duten gaitasun aitortuko profesionalak) eta ordezko irakasleak (irakasle titularren baimenak eta bajak betetzeko irakasleak) irakasle guztien %60 baino gehiago dira eta NUPen ematen diren irakaskuntza orduen %50 inguru ematen dituzte. 616 pertsona dira, 2023. urteko datuen arabera.

Hona hemen, irakasle horien urteko ordainsariak, adibide gisa hartuta ohikoena den kontratua; hau da, asteko 8 irakaskuntza- eta tutoretza-ordukoa: 6.937 euro irakasle elkartuek eta 7.038 euro ordezko irakasleek. Ordainsari hori unibertsitateko irakasle titular baten ordainsariaren %20 baino gutxiago da, eta bere irakaskuntza-orduak irakasle titular baten orduen %50 dira.

Unibertsitateko irakasle guztiek beren eskolak eta materialak prestatu behar dituzte, ikasleen etengabeko eta azken ebaluazioa egiteaz gainera. Beraz, irakasle elkartuek eta ordezko irakasleek gainerako irakasleek egiten duten irakaskuntza-jarduera bera egiten dute. Hala ere, ez zaie aitortzen irakaskuntzako eta tutoretzako ordutegitik kanpo emandako denbora, eta, beraz, ez da ordaindua. Horren ondorioz, irakasle horiek lanaldi osoko gainerako figurek baino 2-3 aldiz kostu txikiagoa dute NUPentzat. Ildo horretan, garrantzitsua da nabarmentzea Valentziako Lan Arloko 18. Epaitegiaren 2024ko apirilaren 17ko epaia. Epai horrek ordainsari-berdintasuna eta lan-diskriminazioa aitortu ditu, irakaskuntza-lana bere osotasunean kontuan ez izateagatik. Horrela, kolektibo horri aitortzen zaio, Valentziako Unibertsitatean, egiten ari diren lan horietarako irakaskuntza-ordu bakoitzeko lau ordu ordainduak izateko eskubidea, gaur egun ordaintzen ez direnak.

Hori gutxi balitz, NUPek sektore publikotik etorritako irakasle elkartu eta ordezkoekiko berdintasun printzipioa urratzen jarraitzen du, aparteko ordainsaririk eta antzinatasunik ordaintzen ez dielarik, horien soldata oraindik ere prekarioagoa bihurtuz.

Irakasle elkartu eta ordezko horiei ez zaie aitortzen, ezta ere, irakaskuntzako banakako merezimenduen osagarria, gainerako irakasleei bost urtean behin ordaintzen zaiena, ebaluazio bat gainditu ondoren.

Hori gutxi balitz, irakasle horiek pairatzen duten diskriminazioaren barruan, aipatzekoa da NUPek langile guztientzako duen bizi-aseguruaren estalduratik kanpo daudela. Edozein enpresatan aurrekaririk ez duen neurria da, eta kolektibo horrek pairatzen duen diskriminazioan gehiago sakontzen du.

Aipamen berezia egin behar zaio osasun adarreko irakasle elkartuen egoerari, horien baldintzak Osasun Departamentuaren eta NUPen arteko hitzarmen bati lotuta geratu baitira; hitzarmenaren arabera, horien kontratuak aldi baterakoak izango dira beti, eta hiru urtean behin berritu ahalko dira.

Egoera horren aurrean, NUPeko irakasle elkartuek eta ordezkoek gutun bat igorri diete Errektoretzari, Langile Batzordeari eta Nafarroako Gobernuari, 100 irakasleren baino gehiagoren babesarekin, beren ezinegon sakona agertuz eta azpimarratuz akordiorik ez lortzeak orain arte NUPen ezagutu ez diren erabakiak hartzera eramango duela. Gainera, negoziatzeko unea dela gaineratu dute -Langile Batzordea errespetatzen eta onartzen dute, negoziatzeko organo gisa-, baita irakasle elkartuak eta ordezkoak jarrera duin eta errespetagarrian jarriko dituen irtenbidea aurkitzeko unea ere.

*Sinatzaileak: Fernando Carrasco, Luis Eduardo Cuartero, Alfredo Chourraut, Marcos Fernandez, Aitor Garralda, Jesus Maria Sanchez-Ostiz, Eva Lecumberri, Gonzalo Luis Alonso eta Fermin Sagaseta de Ilurdoz (irakasle elkartuak eta NUPeko klaustroko kideak, lotura iraunkorrik ez duten irakasle eta ikertzaileak ordezkatuz).