Euskal Autonomia Erkidegoko (EAE) Barne Produktu Gordina (BPG) %1,8 igo da 2024ko hirugarren hiruhilekoa iazkoaren aldean, hiruhileko artean %0,5 gehitu ondoren. Enplegua, dedikazio osoko baliokidetzako lanpostuen terminoetan neurtuta, %0,3 hazi da hirugarren hiruhilekoan bigarrenaren aldean, eta, horrela, urte arteko hazkundea %1,6koa izan da, hau da, guztira 15.795 lanpostu garbi gehiago sortu dira 2023ko hirugarren hiruhilekoan baino, Eustat estatistika erakundearen datuen arabera.

Zenbatespen horiek Eustaten urriaren 21eko hiruhilekoaren kontu ekonomikoen aurrerapenean lortutako BPGren zenbatespenak hobetu dituzte, hamarren batean hiruhileko arteko hazkundea eta bitan urte artekoa, hain zuzen.

Eskaintzaren ikuspegitik, balio erantsiaren bilakaera positiboa izan da urte artean 2024ko hirugarren hiruhilekoan sektore ekonomiko guztietan, lehen sektorean izan ezik, %1,3 jaitsi baita aurreko urteko hiruhileko beraren aldean, eta %2,3 aurreko hiruhilekoaren aldean.

Industriaren sektorean balio erantsia %0,7 igo da urte artean, eta manufaktura industrian %0,5. Eraikuntzaren sektoreak balio erantsiaren urte arteko %1,5eko gehikuntza izan du. Zerbitzuen sektorea izan da gehien hazi dena, %2,2 hirugarren hiruhilekoan.

KONTSUMOA ETA ENPLEGUA

Eskariaren aldetik, urte arteko hazkundeak orokorrak izan dira. Horrela, etxeetako azken kontsumoko gastuak eta kontsumo pribatuak %1,8ko urte arteko hazkundea izan dute, aurreko hiruhilekoaren aldean %0,3 igo ondoren.

Administrazio publikoen azken kontsumoko gastua edo kontsumo publikoa %2,2 igo da 2023ko hirugarren hiruhilekoaren aldean.

Enplegu mailei dagokienez, lanaldi osoko lanpostu baliokideetan neurtuta, enplegu osoa %1,6 hazi da 2024ko hirugarren hiruhilekoan iazko aldi beraren aldean, aurreko hiruhilekoarekiko %0,3 igo ondoren.

Lehen sektoreak %1,5eko jaitsiera izan du enpleguan 2023ko hirugarren hiruhilekoaren aldean, hiruhileko arteko %1,4ko jaitsierarekin. Industrian, lanpostuen urte arteko hazkundea %0,8koa izan da, aurreko hiruhilekoan baino %0,1 txikiagoa.

Eraikuntzan enpleguaren bilakaera positiboa izan da, bai urte artean (%0,2ko igoera), bai hiruhileko artean (%0,5ekoa). Zerbitzuen sektorean, lanaldi osoko lanpostu baliokideen kopurua %2,0 igo da urte artean, hiruhileko artean %0,4 igo ondoren.

LAKUAREN BALORAZIOA

Atzo argitaratutako datu ekonomikoek hazkunde egonkorra eta orekatua erakusten dute, Iñaki Ruiz Lakuako Ekonomia sailburuordearen arabera.

BPG hazkundea ikusita, urte osorako bere aurreikuspena (%1,9) bete egingo dela «edo desbideraketa oso txiki bat» izango duela azaldu zuen Ruizek.

Industriaren hazkundeari dagokionez, Lakuako sailburuordeak nabarmendu zuen %0,7ko igoera «merezimenduzko» emaitza dela, sektoreak bizi dituen zailtasunak ikusita, batez ere Europako inguruko herrialdeekin dauden harreman ekomikoen harira.

Alemanian, eta neurri txikiagoan Estatu frantsesean, bizitzen ari den egoera txarrak eragina du euskal enpresen esportazioetan, eta bilakaera moderatua eta ziurgabetasuna eragiten ditu industrian.