Telesail hau ‘‘Inside Out’’ (‘‘Del Reves”) filmen unibertso berean garatu da, baina emozioak alde batera utzi eta mundu onirikoan jartzen du arreta. Ametsak dira orain kontakizunaren ardatza.

Film horien spin-off bat dela esan daiteke, adar bat. Lehen eta bigarren filmen artean girotua, eta Rileyren -filmetako neskato protagonista- ametsei forma emateaz arduratzen den zinema estudio moduko baten egunerokoa azaltzen du: “Dream Productions” (“El Sueño Producciones”, gazteleraz). Protagonista nagusia estudioko zuzendari sarituenetako bat izango da, Paula Persimmon. Arazo bati aurre egin beharko dio: Riley hazten ari da eta ametsek ez dute lehen zuten emaitza bera. Testuinguru horretatik abiatuz, ametsak eraikitzeko moduaren irudikapen satirikoa ikusiko duzue; zinemaren munduari, Hollywoodeko estudio baten hierarkiari eta sorkuntza artistikoaren rol profesionalei buruzko erreferentziak etengabeak dira.

Beste behin ere, Pixar-ek minutu gutxiren buruan gure arreta erakartzeko gai diren pertsonaia koloretsu eta eszenatoki distiratsuak aurkeztu ditu.

Film luzeen eta seriearen arteko desberdintasunik handiena istorioa kontatzeko modua da; dokumental faltsuaren estiloa erabiliz grabatuta dago -“The Office” telesailaren tankerakoa-, eta horrek ukitu fresko eta oso dibertigarria eransten dio narrazioari. Ikuslearen eta pertsonaien arteko konexioa sendoagoa da eta une umoretsu gehiago sortzen dira. Lau ataletan -tamalez motzegia da-, nortasun propioa eta une gogoangarriak dituen obra trinko bat eraiki dute. Sormen prozesuaren zaurgarritasunaz edota zinema ulertzeko moduaz diharduen proposamen oso atsegina, maitagarria eta dibertigarria da.