Inozente eguna izateagatik, atzo Kanaria Handietan jokatutako partida nahiko arraroa izan zela aitortu behar da. Eguna eta ordua ere ez ziren normalak izan. Super Amara Bera Bera inozentada handia jasatetik oso gertu aritu zen. 11 segundoren faltan, 24-23 galtzen zihoan, baina Karstenek berdinketa ipintzea lortu zuen azken momentuan.

Lehenengo 30 minutuetan emandako markagailu txikiak (10-11) adierazten ditu bi taldeek ate aurrean izandako hutsak. Hutsak eta, Bera Beraren kasuan, Lucia Pradesen geldiketak ere aipatu behar dira, seirekin amaitu baitzuen lehen zatia, eta 11rekin lehia. Markagailu txiki hori baloi galtze dezentetik etorri zen eta, gainera, donostiarrek zenbait zutoin jo zituzten.

Lehen zati orekatu baten amaieran, oso segundo arraroak bizi izan ziren. Rocasak baloiaren jabetza zuela, epaileek Alba Menendez bi minutu kaleratu zuten. Hala ere, etxekoek ez zuten asmatu eta baloia galdu zuten. Anne Erauskinek gola sartu zuen atea hutsik zegoela eta denbora agortzear zela (10-11).

Jokalari bat gutxiagorekin hasi zuen Bera Berak bigarren zatia. Larissak eta Almudena Rodriguezek min handia egin zieten, baina azken minutuetan tentsio handiari aurre egin eta, behintzat, puntu bat berreskuratzea lortu zuten.

BETI ONAK

Beti Onak taldeak, bestalde, urtea garaipenarekin amaitzea lortu zuen. Etxean egin zuen, bere zaleen aurrean Eldaren aurka hasiera-hasieratik oso nagusi izanda (32-28). Atsedenaldian bost goleko abantaila zuten nafarrek (16-11). Maria Grasielly izan zen taldeko golegile nagusia, bostekin.

GAUR, ZUAZOREN TXANDA

Gaur eguerdian Zuazoren txanda iritsiko da. 12.30etik aurrera, Barakaldokoek zazpigarren sailkatua den Valladolid jasoko dute Lasesarren. Bizkaitarrek garaipena beharrezkoa dute Bera Beraren aurkako porrota atzean utzi eta azken-aurreko postutik ateratzeko.