Osakidetzako akutuen ospitale handietako batean egun bateko egonaldiak 1.339 euroko kostua du, eta 2.025 eurora iristen da ospitale horietako unitate berezi batean bada.

Osakidetzak 2025eko ekitaldian osasun zerbitzuak emateagatik ordaindu beharreko tarifak argitaratu zituen atzo.

Prezio horiek asegururen bat dutenei fakturatzen zaizkie, hala nola ibilgailuenak, eskolakoak edo kirol federazioenak, bai eta osasun sare publikoan artatutako lan istripuen edo gaixotasun profesionalen mutualitateei ere.

Prezio horiek kobratzen zaizkie, halaber, Europar Batasuneko herrialdeetako osasun sistemetako aseguratuei eta espainiar Estatuak osasun laguntza emateko hitzarmenak sinatuta dituen beste herrialde batzuetako aseguratuei.

Osakidetzaren prezio zerrendaren arabera, garestiena jaioberriak gorputzez kanpoko mintzarekin oxigenatzea da (183.878 euro). Gertu daude bihotzeko edota biriketako transplante larri bat (146.195 euro) edo bihotzeko desfibriladore bat ezartzea (145.821 euro).

Bypass koronario batek 23.247 eta 54.662 euro artean balio du; taupada-markagailu bat ezartzeak, 15.044 eta 32.612 euro artean; eta giltzurrun transplante batek, 30.764 eta 70.472 euro artean.

Iztondoko hernia baten ebakuntzak 4.910 eta 31.034 euro artean balio du, eta aldakaren artikulazioa ordezkatzeak, alegia, protesi bat ezartzeak, 10.567 eta 27.288 artean.