Kulturaren Euskal Behatokiak eta Euskal Herriko Musika Bulegoa Elkarteak (EHMBE) elkarlanean ‘‘Musikaren sektorearen egoera, premiak eta erronkak Euskal Herrian’’ txostena osatu dute, musika sektoreak Euskal Herrian duen lekua eta eragina neurtzeko. Azaldu dutenez, 39,5 milioi euroko negozio bolumenarekin eta 646 langile baino gehiagorekin, euskal musika industriak «bere dinamismoari eusten dio», baina nabarmendu dute sektoreak «erronka garrantzitsuak» dituela aurrez aurre.

Txostena sektoreko 93 eragileri (%58 artistak eta %42 industria) egindako inkesta batean oinarrituta dago. Datuek agerian uzten dute zuzeneko ekoizpenaren garrantzia, industria jardueraren %47,8 hartzen baitu, eta sektorea askotarikoa dela ere agerian geratzen da: agenteen %30,4 zerbitzu tekniko eta laguntzaileetan aritzen da, eta %21,7, kontzertu aretoetan.

Behatokiak eta Musika Bulegoak sektorearen «egonkortasun ekonomikoa» ere aipatzen dute txostenean, enpresen %20,2k urtean 80.000 euro baino gutxiago fakturatzen badute ere, beste %23,1ek milioi bat euro baino gehiago fakturatzen baitute, «eta horrek erakusten du ekimen txikiak eta proiektu finkatuak batera daudela», azpimarratu dute.

PRESTAKUNTZA ETA PREKARITATEA

Sektorearen erronka nagusietako bat zuzeneko ikuskizuneko teknikariak kontratatzea dela ere nabarmendu dute galdekatuek, industriak gehien eskatzen duen profila baita (%70,9). Gainera, agenteen %51,3k adierazi dute zailtasun handiak dituztela langile kualifikatuak aurkitzeko. Hala, agerian geratzen da prestakuntza funtsezko faktorea dela sektorearen etorkizunerako.

Artistei begiratuta, aldiz, prekaritateak errealitate izaten jarraitzen du: %30 ezin dira musikatik soilik bizi, eta diru-sarrerak beste jarduera batzuekin osatu behar dituzte; batez ere, irakaskuntzarekin. Genero ikuspegia ere puntu kritikoa da: emakumeak sektorearen %39,7 dira eta gehiengoa dira diru-sarrera txikienetan (%43k 10.000 euro baino gutxiago irabazten du urtean).

Digitalizazioa eta jasangarritasuna ere izan dituzte hizpide txostenean. Bildutako datuen arabera, artisten %61,1ek oraindik ez dute erronka digitalen eta adimen artifizialaren aurrean neurririk hartu, «nahiz eta industria norabide horretan mugitzen hasi den», ohartarazi dute txostenaren egileek.

Horrekin batera, finantzaketak erronka izaten jarraitzen duela ere erakusten du azterlanak, kredituak eta babesleak eskuratzeko zailtasunak aipatu baitituzte galdekatuek. Hala ere, Euskal Herriko musikaren sektoreak «euskal kulturaren funtsezko zutabea» izaten jarraitzen duela azpimarratu dute, baita «tradizioa eta berrikuntza» uztartzen dituela ere.