Zerutik infernura. Halakoak izan ziren pilota munduak, eta bereziki Joseba Ezkurdiak, bizitako azken 24 orduak. Igandean Arbizuko aurrelariak Binakako txapela eskuratu zuen Beñat Rezustarekin batera, zerua ukituz; baina atzo jakitera eman zutenez, bere aita Mattin zendu zen, pilotazale guztien artean tristura handia utziz.

Indarra eta kemena izan dira aitak semeari utzitako azken ondarea. Duela egun batzuetatik zegoen ospitalean aita eta igande arratsaldean, ospakizunetara abiatu aurretik, aurrelariak aitari bisita egin zion bere hirugarren txapela eskuratu ostean, garaikurra eskaintzeko. Atzo, ordea, Joseba Ezkurdiak buelta erdi egin behar izan zuen Donostiara Buruz Buruko aurkezpenera zihoala, aitaren osasunak okerrera egin zuela eta.

Aspeko pilotaria bera asko hunkitu zen igandean, ibilbideko hirugarren txapela eskuan, garaipena amari eta aitari eskaintzean. «Txapel hau beraientzat da, beraiek baitira txapeldunak», azpimarratu zuen malko artean.

Gertaeren zurrunbilo horretan, Beñat Rezustak ere inoiz baino biharamun gogorragoa izan zuen atzo. Arbizuko ospakizunetatik Bergarako, bere herriko, pilotalekura abiatu zen arratsaldean bertan txapela hedabideei eta pilotazale gazteenei erakusteko.

BURUZ BURUKOA

Bien bitartean, Ezkurdia izan zen sistema bera izango duen Buruz Buruko aurkezpeneko hutsune nabarmenena eta Jokin Altunaren inguruan pausatu ziren begirada guztiak, laugarren txapelaren bila abiatuko baita. 29 urte bete berriak dituela, Atano III.ak, Ruben Belokik eta Aimar Olaizolak irabazitakoa berdinduko luke. Orain arteko itxaronaldia luzea egin zaiola aitortu zuen Altunak, «baina orain jada ilusioz nabil» eta erronkari ekiteko prest. Bestalde, hiru aurpegi berri izango ditu aurtengo Buruz Burukoak: Baiko-tik, Senar eta Larrazabal, eta Aspeko Peio Etxeberria.

Azken honek ere huts egin zuen atzo, etxean begian jasandako kolpe bategatik. Konplikaziorik ez badago, igandeko neurketa jokatzeko moduan izango da.