Frantzisko aita santuaren hileta elizkizuna apirilaren 26an izango da, 10.00etan, Done Petri plazan. Aurretik, gaur, hilkutxa Vatikanoko basilikara eramango dute, fededunen omenaldia jaso dezan.

Hiletan mundu osoko Estatuburuak egotea aurreikusita dago, eta Giovanni Battista Re Kardinal-kolegioko dekanoak zuzenduko du. Amaieran, hilkutxa Andre Maria Nagusiaren basilikara eramango dute, bertan lurperatzeko, Aita Santu argentinarrak testamentuan idatzitakoari jarraituz.

Halaber, gaur, otoitz une baten ondoren, Kevin Joseph Farrell kardinalak gorpuaren lekualdatzea hasiko du. Prozesioa Santa Marta plazatik eta Erromatar Protomartirien plazatik igaro ondoren Done Petri plazara iritsiko da, Vatikanoko Basilikan amaitzeko. Kardinal kamarlengoak zuzendutako liturgia amaitu ostean hasiko da fededunen bisita.

Oraindik ez da zehaztu zenbat denboraz egongo den ikusgai gorpua; izan ere, Frantziskok berak aita santuen hileten arauetan aldaketa batzuk egin zituen. Hala, gorpua zurezko hilkutxa irekian jarri da, baina ez katafalkoan, orain arte bezala, eta ez da Aita Santuaren makulurik erakutsiko.

Vatikanoak Frantzisko aita santuaren lehen irudiak zabaldu zituen atzo, Santa Marta Etxeko kaperan. Aita Santua belus gorriz forratutako egurrezko hilkutxa baten gainean dago, kasulla purpura eta mitra zuri batekin, eta eskuetan arrosario bat darama.

Irudiak astelehenekoak dira eta bertan Erroman dauden kardinal ugari agertzen dira. Horiek atzo bildu ziren Sinodo Gelan, hurrengo urratsak zehazteko.