CIC bioGUNEko ikertzaileek ikerketa metabolomiko bat egin dute eskala handian, sindrome metabolikoaren hasiera eta progresioa gernuan dauden metabolito talde txiki batekin lotzen dituena.

Azaldu dutenez, sindrome metabolikoa aldi berean gertatzen diren gaitzen multzoa da, eta gaixotasun kardiakoa, istripu zerebrobaskularrak eta bi motatako diabetesa izateko arriskua areagotzen dute. Nahasmendu horien artean, obesitatea, odoleko glukosa maila altuak, kolesterola edo triglizeridoak eta arteria-presioaren igoera daude.

Esan dutenez, «nahasmendu horietako bakar bat izateak ez du esan nahi Sindrome Metabolikoa dagoela, baina gaixotasuna garatzeko arrisku handiagoa» dago.

Sindrome Metabolikoa «gero eta ohikoagoa» da eta helduen «ehuneko handi bati» eragiten diola nabarmendu dute.

Hala ere, zentro zientifiko teknologikoak ohartarazi duenez, «ez dago sindrome metabolikoarentzat adostutako definiziorik, ezta parametro objektibo eta kuantifikagarrietan oinarritutako proba diagnostiko argirik ere».

Metabolitoen kontzentrazioa

Argitaratutako azterlanak eredu matematiko bat garatu du, «sindrome metabolikoa diagnostikatzea ahalbidetzen duena, bere etapa goiztiarretik aurreratuenaraino metabolito multzo baten kontzentrazioan oinarrituta, gernu-lagin bat erabiliz».

Azterlana egiteko, populazio orokorraren 11.000 gernu-lagin baino gehiago aztertu dira, RMNn oinarritutako metabolomika-teknikaren bidez.

Oscar Millet doktoreak, CIC bioGUNEko ikertzaile nagusiak, gidatutako lanak hainbat erakunde eta zentroren laguntza izan du. Aipatutakoen artean, besteak beste, Osarten, Mondragon Korporazioa, Valentziako Unibertsitateko Prebentzio Medikuntza eta Osasun Publikoko Departamentua, Los Angelesko Cedars-Sinai Medical Center-eko KarshDivision of Gastroenterology and Hepatology edota Turineko Gastrolenterology Departament daude.

Era berean, ikerlanean parte hartu dute GetxoKirolak-ek, Jaume I Unibertsitateko Hizkuntza eta Sistema Informatikoen Sailak, Gaixotasun Hepatiko eta Digestiboen CIBER-ek (CIBEREHD) eta Obesitatearen eta Nutrizioaren Fisiopatologiako CIBER-ek (CIBEROBN).