Azken bi urteetako etenaldiaren ondoren, Sopelak Sprint Duatloiaren edizio berri bat izango du otsailaren 19an. Kirol proba berritasun batekin dator, gainera, proba egokitu bat izango baitu, 1,5 kilometro oinez eta 7,5 bizikletaz egiteko proposamena dakarrena.

Udalak eta Hirubi Triatloi Sopela Klubak antolatzen dute kirol topaketa, Euskadiko Triatloi Federazioaren laguntzarekin. Triatloian federatuta dauden kirolarientzako proba irekia da, oinezko bi lasterketa eta bizikletazko bat biltzen dituena.

Parte hartzeko aldez aurretik eman behar da izena eta 30 euroko kuota eskatzen zaie kirolariei. Bi bide daude izena emateko, triatloi.org edo rockthesport.com web orrien bidez.
Antolakuntzak zehaztu duenez, epea zabalik egongo da otsailaren 19ra arte edo 250 plazak bete arte.

Ibilbideari dagokionez, probaren irteera eta helmuga eremuak Trantsizio Eremuaren albo batean egongo dira, Ripa kalean, eta publikoak trantsizioak, irteera eta helmugara iritsiera ikusi hala izango ditu, aurreratu dutenez.

Hiriko zirkuituari bi buelta

Esprinta bost kilometrokoa izango da –1,5ekoa proba egokituaren kasuan– eta Sopelan zehar egokitutako hiriko zirkuituan burutuko da, bi buelta emanez. Txirrindularitzaren probaren barruan, 20 kilometro egin behar dituzte kirolariek –7,5 proba egokituko parte hartzaileek– eta oinezko lasterketan, 2,5 kilometrokoa da hiri zirkuituari bira bat emanez, eta 1,5 kilometro egokitutako probari dagokionez.

Proba egokitua lehena izango da, 14.45ean, eta ondoren, emakumezkoena 16.15ean abiatuko da, eta 16.30ean gizonezkoena.

Kategoria absolutu bakoitzeko lehen hiru sailkatuek garaikurra eta 100, 75 eta 50 euroko txartelak eskuratuko dituzte, eta garaikurra gainerako kategorietako lehen sailkatuentzat eta taldekako irabazleentzat, baita herrikoentzat ere. Sari banaketa 18.30ean izango da Udaletxeko plazan.